ҰЛТТЫҚ ҰЛАН ҰЛЫЛАР ЕЛІНДЕ

Ұлттық ұланның ақпараттық насихаттық тобы Абай облысына келді. «Жаңа Қазақстан — жаңа ұрпақ» акциясы аясында бірнеше кездесу өткізіп, семейліктерге концерттік бағдарлама ұсынды.
А.ӘБІЛ,
«Semeı tańy»
— ҚР Ішкі істер министрінің тапсырмасымен және Ұлттық ұланның бас қолбасшысы, генерал-лейтенант Еркін Ботақановтың шешімімен ақпараттық-насихаттық топпен Шығыс Қазақстан, Абай және Павлодар облыстарын аралауды ұйғардық. Негізгі мақсатымыз – жастарды Отанды, елді, жерді сүюге тәрбиелеу, аға ұрпақтың ерлігін, әскери өмірдің салтын дәріптеу. Оларға Отан қорғаудың қасиетті борыш екенін жеткізу. Ішкі істер органдары мен Ұлттық ұлан қызметін жұртшылыққа таныстыру. Елордамыз Астананың 25 жылдығы шеңберінде басталған акцияның маңызы зор, мәні терең. Ақпараттық топтың құрамында Ұлттық ұланның ән-би ансамблі де арнайы келіп отыр. Біз елді, жерді сүю ұғымдарын, тек құр сөзбен айтып қана қоймай, әскери әуендермен, майдан әндерімен, қазіргі заманғы музыкамен жеткізуді ұйғардық. Жастардың рухын жанып, патриоттыққа тәрбиелеудің жақсы бір әдісі деп ойлаймыз мұны. Өскемен қаласында, Шемонаиха және Күршім аудандарында болып, қасиетті Семей шаһарына енді келіп отырмыз. Акция аясында қарттар үйіне барып, қайырымдылық шара өткіздік. Екінші дүниежүзілік соғыс пен тыл ардагерлері, Ұлттық ұланға еңбегі сіңген аға буын өкілдерімен кездестік. Балалар мен қарттар үйінде шағын концерт қойдық. Көп балалы отбасылардың балаларына сыйлықтар бердік. Бізді бастап келген — Ұлттық ұланның бас қолбасшысының тәрбие және әлеуметтік мәселелер жөніндегі орынбасары, Халық қаһарманы Қайрат Үмбетов,- дейді Ұлттық ұлан бас қолбасшылығы баспасөз қызметінің өкілі Қуаныш Қожахметов.
Ұлттық ұланның ән-би ансамблі 1991 жылы құрылған екен. Әуелде 4-5 адам болған, қазір өнерпаздардың қатары жүзге жуықтап қалыпты.
— Бұл шараның мақсаты — жастарды әскери өмірге қызықтыру. Өнер арқылы шақыру. Ансамбльде қазір 96 адам жұмыс істейді. Еңбек сіңірген қайраткерлер де, полковниктер қызмет атқарады. Репертуарымыз әр түрлі. Бірнеше аспаптың түрі бар. Күйшілеріміз де, бишілеріміз де бар, хорымыз да бар. Патриоттық әндерге басымдық беріледі. Ерекше атап өтерлігі, ансамбльдің репертуарының 80 пайызы — өзіміздің әндер. Өзіміз өңдеп, өзіміз орындаймыз. Басқа ұжымдардан ерекшелігіміз – осы. Тамыз айында халықаралық фестиваль өтеді. Бұйырса, соған қатысамыз. Одан кейін осындай ақпараттық-насихаттық топпен Батыс Қазақстанға бару ойымызда бар. Сол жақтың бүкіл қаласын аралап, өнерімізді паш етсек дейміз,- дейді Ұлттық ұлан ән-би ансамблінің көркемдік жетекшісі Алпамыс Асылбек.