Жыл басынан бері Абай облысының прокуратурасы 3 мыңнан астам кәсіпкердің құқығын қорғады. Бұл туралы өңірлік коммуникациялар қызметінде өткен баспасөз мәслихатында Абай облысының прокуроры Ерлан Абаев мәлімдеді.
Айтолқын САМАТОВА,
«Semeı tańy»
Өңірлік коммуникациялар қызметінде өткен баспасөз мәслихатында Абай облысының прокуроры Ерлан Абаев прокуратура, кәсіпкерлердің құқықтарын қорғаумен қатар, құқық бұзушыларды тәртіптік және әкімшілік жауапкершілікке тартатынын айтты.
– Мемлекет басшысының прокуратураның алдына қойған міндеттерінің бірі – кәсіпкерлікті қорғау. 2023 жылы прокуратура органдары 3 мыңнан астам кәсіпкердің құқығын қорғап, 283 заңсыз салық бұйрығының күшін жойды. Кәсіпкерлер құқығын қорғау мақсатында мобильді топтар құрылды. Сондай-ақ кәсіпкерлік субъектілерімен тығыз жұмыс жасау шараларын қолға алып жатырмыз. 230 кәсіпкерге мемлекеттік органдар жүктеген 190 млн теңге төленді. 70 лауазымды тұлға тәртіптік жауапкершілікке тартылды, прокуратура бақылаушы органдардың 7 заңсыз тексеруінің күшін жойды. Сондай-ақ кәсіпкерлерге қатысты 3 қылмыстық іс тоқтатылды, — деді Ерлан Абаев.
Прокуратура органдары жиі кездесетін заң бұзушылықтармен жүйелі түрде күресуде.
— Бұзушылықтар көбіне жобалық-сметалық құжаттамасыз мемлекеттік сатып алу процесін жүргізумен, бәсекелестікті болдырмайтын шектен тыс талаптар қоюмен байланысты.
Мысалы, Жарма ауданындағы жол жөндеу жұмыстары бойынша конкурс жойылды. «ҚазАвтоЖол» жөндеу жұмыстарын жүргізуді жоспарлаған жол учаскесіне 294 миллион теңге жұмсалуы керек еді. Әкімшілік жауапкершілікке 10 адам тартылды. Аула аумақтарын абаттандыруға 50 миллион теңге көлеміндегі қаражатты жымқыру фактілері анықталды,- деп қосты Абаев.
Облыс прокуратурасы азаматтардың еңбек құқықтарын қорғауды жалғастыруда.
– Жыл басында біздің тікелей қатысуымыздан кейін Психикалық денсаулық орталығы 950 қызметкерге 128 млн теңге төледі. Сонымен қатар прокуратура коммуналдық қызметтердің бағасын қадағалайды. Мәселен, Жарма ауданында қазір 924 тұтынушы жылу үшін бұрынғыдан 55 пайызға аз төлем төлейді, тарифтің көтерілуі заңсыз болған, – деді Абай облысының прокуроры.
Жалпы, облыста криминогендік жағдай тұрақты, соған қарамастан, жалпы қылмыстық құқық бұзушылықтардың аздап өскені байқалады.
– Облыста аса ауыр қылмыстар саны 14 пайызға азайған. Бұл ретте тіркелген қылмыстық құқық бұзушылықтардың жалпы саны 25 пайызға өсті. Бұған интернеттегі алаяқтық фактілерінің көбеюі себеп болды, – деді Ерлан Абаев.
Сондай-ақ Ерлан Абаев БАҚ өкілдерінің кейбір саяжай кооперативтерінің төрағаларына қатысты қылмыстық істер туралы сауалына жауап берді.
– Бау-бақша серіктестіктеріне тексеру жүргізіліп, монополияға қарсы департаменттің қызметкерлері тартылды. Электр энергиясын беру, қосу және ажырату қызметі лицензия бойынша жүзеге асырылуы тиіс екені анықталды. Серіктестіктердің бұл лицензиялары болмағандықтан, заңсыз әрекеті үшін олар әкімшілік жауапкершілікке тартылды. Қаулы әлі заңды күшіне енген жоқ. Сонымен қатар серіктестік басшыларының біріне қатысты қылмыстық іс қозғалды, монополияға қарсы комитеттің лицензиясыз электр қуатын қосу және өшіру әрекеті заңсыз екендігі туралы ұйғарымы шығарылғаннан кейін ол абоненттерді өз бетімен өшіруді жалғастырған. Қазір қылмыстық іс қозғалды, оны ішкі істер органдары тергеп жатыр, — деп қорытындылады Ерлан Абаев.
