Абай облысында заңсыз аңшылықты азайту және жануарлар дүниесін қорғау мақсатында аңшылық алқаптар бекітілуде, деп хабарлайды ҚазАқпарат тілшісі.
Абай облысы әкімдігінің мәліметіне сүйенсек, өңір бойынша аңшылық алқаптарды бекіту жұмыстары қолға алынды.
«Аңшылық алқаптарды бекіту – браконьерлікті төмендету, жануарлар дүниесін қорғау мен өсімін молайту мақсатында жүргізіледі. Алқаптар бекітілгеннен кейін шаруашылықтарға жануарлар дүниесін қорғау және жануарларды азықтандыру міндетті болады. Бүгінде Абай облысының аумағында 19 аңшылық алқап бар. Оның 8-і бекітілген және 11-і резервтік қорда орналасқан. Онда жануарлардың 30-дан астам түрі мекендейді», — делінген ақпаратта.
Бекітілген аңшылық алқаптарында аңшылық шаруашылықтар шарт аясында биотехникалық іс-шараларды жүргізуге міндеттеледі. Сондай-ақ жануарлар түрлерінің санын есепке алу, деректерді талдау жүргізетін болады.
«Бұдан бөлек, Абай облысының табиғи ресурстар және табиғат пайдалануды реттеу басқармасы gosreestr.kz веб-порталында аңшылық алқаптарды электрондық түрде бекіту бойынша конкурс өткізіп жатыр», — делінген хабарламада.
