Семей қаласының коммуналдық инфрақұрылымын жөндеуге ҚР Үкіметінің резервінен 16,3 млрд теңгеден астам қаржы бөлінді. ҚР Премьер-Министрі Әлихан Смайылов тиісті қаулыға қол қойды.
Семей қаласының жылу желілерінің ұзындығы 322 шақырым, оның 68 пайызы тозған. Кей бөліктердегі жылу желілерінің тозуы 100 пайызға жетеді (1966 жылы іске қосылған). Өткен жылыту маусымында қала желілерінде 337 апатты жағдай орын алды, бұл алдыңғы жылмен салыстырғанда 21 пайызға артық.
Семей қаласын жылыту маусымында сапалы қызметпен қамтамасыз ету және төтенше жағдайлардың туындау қаупін азайту, жылыту маусымының үздіксіз өтуін қамтамасыз ету мақсатында облыс әкімдігі жылу желілерінің тозығы жеткен бөліктерін анықтап, жобалық-сметалық құжаттама әзірлеп, жөндеу жұмыстарын жүргізуге сараптамадан оң қорытынды алды.
Үкімет резервінен бөлінген қаржыға Семей қаласындағы желілік сорғылары ауыстырылып, 1-ЖЭО-дан 1, 2, 3, 4 павильондарға дейін 5,8 шақырым магистралдық жылу желілері күрделі жөнделеді.
primeminister.kz
