Абай өңірлік коммуникациялар қызметінде облыстық энергетика және тұрғын үй-коммуналдық шаруашылық басқармасы басшысының міндетін атқарушы Жандос Қайырхановтың қатысуымен баспасөз мәслихаты өтті.
Жадыра ТӨЛЕГЕНҚЫЗЫ,
«Semeı tańy»
Жандос Қайырханов атап өткендей, биылғы жылдың бірінші жарты жылдығындағы жағдай бойынша, Абай облысында 19 598 азамат тұрғын үй кезегінде тұр. Оның ішінде 2 898-і — жетім балалар, 7 224-і — халықтың әлеуметтік осал топтарына жататын тұрғындар, 2 411- і — көп балалы отбасылар, 6 935-і — мемлекеттік қызметшілер мен бюджеттік ұйымдардың қызметкерлері, 125–і — жалғыз тұрғын үйі апатты деп танылған азаматтар.
— Биыл облыс бойынша мемлекеттік тұрғын үй қорынан 621 тұрғын үйді қолданысқа беру жоспарлануда. Оның 120-сына тұрғындар қоныстанды, қалған 501 тұрғын үй алдағы уақытта қолданысқа беріледі,- деді Жандос Қайырханов.
Қазіргі уақытта Абай облысында 66 көп қабатты тұрғын үйдің, оның ішінде мемлекет қаражаты есебінен 40 несиелік үйдің (2448 пәтер) құрылысы жүргізілуде.
— Бұл — тұрғын үйлердің бағасын төмендету, жалпы, халықтың әл-ауқатын жақсарту бағытында жүзеге асырылып жатқан мақсатты шаралар. Ағымдағы жылы халықтың әлеуметтік тұрғыдан осал топтары үшін ауданы 44 830 мың шаршы метр болатын 576 жалдамалы тұрғын үй сатып алу жоспарлануда. Бұған республикалық бюджеттен 5,5 млрд теңге қаражат бөлінді. Бүгінгі таңда барлық аудандар мен қалаларда бір қабатты пәтерлерді сатып алу бойынша мемлекеттік сатып алу порталында жұмыс жүргізілуде,- деді Жандос Маратұлы.
Басқарма басшысы міндетін атқарушының айтуынша, жеке тұрғын үй қорынан жалға алынған тұрғын үй төлемдері үшін 2023 жылға облыстық бюджеттен 173 млн теңге бөлініп, «Отбасы банк» АҚ-мен қаражат аудару туралы келісімшарт жасалған. Биыл Абай облысының азаматтарынан 96 өтінім келіп түсіп, оның 24-і мақұлданған, 27 өтініштен негізді себептер бойынша бас тартылған.
Баспасөз мәслихаты соңында Жандос Қайырханов БАҚ өкілдері сауалдарына жауап берді.
