Абай облысы Семей қаласының ішкі саясат бөлімінің әлеуметтік тапсырысы аясында ауыл жастарын қолдауға арналған «Әлеуметтік керуен» жобасы бастау алды. Жоба шеңберінде арнайы топ қаламыздың төрт ауылдық округінің жастарымен еркін форматта кездесу өткізді.
Айтолқын САМАТОВА,
«Semeı tańy»
Әлеуметтік керуен жобасының негізгі мақсаты — ауыл жастарының шығармашылық және интеллектуалдық әлеуетін дамыту. Жоба шеңберінде жолға шыққан арнайы топтың құрамына «Отбасы банк» АҚ, Абай облысы Семей қаласының Мансап орталығы, Семей қаласының жастар ресурстық орталығы және Интеллектуалды жастар қауымдастығының өкілдері енді.
Мамандар Көкентау, Достық, Ертіс, Жиенәлі ауылдық округтерінде болып, ауыл жастарымен жүздесті. Кездесу барысында Жастарды қолдауға арналған мемлекеттік бағдарламалар мен гранттар туралы жан-жақты ақпарат беріп, сауалдарына жауап қайтарды.
— «Әлеуметтік керуен» жобасы жастар үшін аса маңызды. Бұл жоба ауыл жастарына ақпараттық кеңестер беріп, мемлекеттік бағдарламалармен таныстырып, сауалдарына жауап беруге бағытталған. Керуен құрамында мемлекеттік органдар мен арнайы мекемелердің маман-кеңесшілері бар, — деп атап өтті Жастар ресурстық орталығын директорының міндетін атқарушы Ерсінбек Өрлеубек.
Ауыл жастары әр сала өкілдерінен кеңес алып, өздеріне қажетті ақпараттарға қанықты.
