Бүгінде еліміздің тәуелсіздігі мен ұлттық қауіпсіздігін қамтамасыз ету мақсатында кешенді бағдарламалар қабылданып, нақты жұмыстар жүргізіліп жатыр. Әсіресе шекаралық аудандардың стратегиялық маңызы өте зор.
Түркістан қаласында Мемлекет басшысы Қасым-Жомарт Тоқаевтың қатысуымен өткен Ұлттық құрылтайда осы мәселе қаралып, жаңа аудандар құрылатын болды.
— Шекара маңындағы елді мекендердің ахуалы жеріміздің тұтастығына және еліміздің амандығына тікелей ықпал етеді. Шын мәнінде, бұл – стратегиялық маңызы бар мәселе. Өкінішке қарай, шекара шетіндегі кейбір елді мекенде халық саны күрт азайып кетті. Бұған бір кездегі аудандарды біріктіру жөніндегі шешімдер де ықпал еткені сөзсіз.
«АМАNАT» партиясы бірқатар шекаралас ауданды қалпына келтіру туралы бастама көтергенін білесіздер. Үкімет менің тапсырмаммен бұл мәселені пысықтады. Мен соған сәйкес, Катонқарағай, Марқакөл және Мақаншы аудандарын қалпына келтіру туралы негізгі шешімді қабылдадым,- деді Президент.
Экономика ғылымдарының кандидаты Биболат Қуантқан Мемлекет басшысының бастамасы ел қауіпсіздігін қамтамасыз етуде маңызды саяси шешім болды дейді.
— Мақаншы өңірі – Бақты кеден бекеті арқылы өтетін Қытаймен Қазақстан және Ресейді байланыстыратын ірі тас жол тораптарының бойында орналасқандықтан, бұл өңірді басып өтетін жүк көліктері мен жеке жолаушылардың қарасы аз емес. Сонымен қатар жаңадан салынатын Аягөз – Бақты темір жолының құрылысы да осы аймақтың әлеуметтік-экономикалық дамуына, жаңа жұмыс орындарының ашылуына әсерін тигізіп, үлкен транзиттік әлеуетке ие болады.
Мақаншы ауданын құру бұл өңірдің әлеуметтік-экономикалық дамуына, жаңа жұмыс орындарының ашылуына, агроөнеркәсіп, туризм мен инфрақұрылымды дамытуға зор ықпал етеді. Президент Қасым-Жомарт Тоқаевтың бұл саяси шешімі мемлекетіміздің қауіпсіздігін қамтамасыз етіп, әлеуметтік-экономикалық дамуына да жаңа серпін береді,- дейді сарапшы.
Қазіргі уақытта шекаралық аудандарды ашу үшін ұйымдастыру жұмыстары басталды. Қажетті бағдарламалар мен іс-шаралар жоспары әзірленіп жатыр.
Абай облысы өңірлік коммуникациялар қызметі
