Семейде белгіленбеген орындарда сауда жасауға тыйым салынып, көшедегі бейберекет сауданы жою және тәртіпке келтіру мақсатында жүйелі жұмыс жүргізіліп жатқаны белгілі.
Айдос МАҒЗҰМБАЕВ,
«Semeı tańy»
Бекітілген іс-шаралар жоспарына сәйкес учаскелік полиция инспекторлары күн сайын рейдтер жүргізуде.
Әдетте, мұндай сауда жасаушылар заттарын жерге, жәшіктің үстіне қойып, көліктер мен жаяу жүргіншілер көп жүретін жерлерде, базарлар мен дүкендер маңында сапасы белгісіз тауарлар сатумен айналысады. Санитарлық талап сақталмай, көшеде сатылған өнімдер денсаулыққа зиянын тигізуі әбден мүмкін.
— Заңсыз сауданың жолын кесу мақсатында күнделікті негізде тексеру шаралары жүргізілуде. Жыл басынан бері учаскелік полиция инспекторлары ҚР Әкімшілік құқық бұзушылық туралы кодексінің 204-бабы бойынша, яғни белгіленбеген орында сауда жасаудың 395 дерегін анықтап, жолын кесті. Аталған баптағы заңның бұзылуы ескерту жасау және 5 АЕК мөлшерінде айыппұл салуға әкеліп соғады,- деп хабарлайды Абай облысының Полиция департаменті.
Бүгінгі күнге дейін жабайы саудамен айналысқан тұрғындарға 500 мың теңгеден астам айыппұл салынған.
