Шардағы жаңарған білім ордасы

Шар қаласындағы Абай атындағы мектеп-балабақша кешенінің ұжымы биыл алғашқы қоңырау салтанаты мен жаңа оқу жылын жарқыраған жаңа ғимаратта қарсы алды.
А.ӘБІЛ,
«Semeı tańy»
Салтанатты шараға Жарма ауданының әкімі Жарқынбек Байсабыров қатысып, мектеп оқушылары мен ұстаздар қауымын құттықтап, осынау үлкен құрылысты жүргізген мердігерлерге, демеушілік көрсеткен жергілікті кәсіпкерлер мен мектеп түлектеріне алғысын білдіріп, ұстаздар мен оқушыларға жаңа оқу жылында сәттілік тіледі. «Биылғы оқу жылы Сіздердің мектептеріңіз үшін көптен күткен, ерекше жыл деп айтуға болады. Облыстық бюджеттен 393 миллион теңге қаражат бөлініп, салынғаннан бері, яғни 45 жыл бойы күрделі жөндеуден өткізілмеген ғимарат толықтай жаңартылып отыр. Яғни, оқушылар заман талабына сай мүлдем жаңа кейіпке енген ғимаратта білім алатын болады. Бұл – мұғалімдер мен ата-аналар қауымына ғана емес, бүкіл қала жұртшылығы үшін қуанышты жағдай» деді аудан басшысы.
300 бала білім алатын мектепті күрделі жөндеу жұмыстарын «Алатау» жауапкершілігі шектеулі серіктестігі жүзеге асырып, халық игілігіне беріп отыр. Жалпы аудан бойынша бүгінгі таңда 38 білім ордасында оқу-тәрбиемен 7 мыңнан аса жуық оқушы қамтылған. Биылғы жылы 621 бүлдіршін мектеп табалдырығын алғаш рет аттайды.
1 сыныпқа қабылданған бүлдіршіндері өздерінің білімге деген ұмтылыстарын білдіріп, өлең шумақтарын оқыды. Оқушылар асыға күткен алғашқы қоңырау соғылғаннан кейін аудан басшысы мен қонақтар жаңартылған білім ордасының ішін аралап, кітапхана кабинетінде болып, мектеп жетістіктері мен тарихынан сыр шертетін көрмені тамашалады.
Жүргізілген күрделі жөндеудің нәтижесінде ғимараттың сыртқы және ішкі дизайны көз тартарлық біртұтас пішінге ие болды. Барлық бөлмелердің терезелері мен есіктері ауыстырылып, қабырғалары тегістелді. Төбенің шатыры ретке келтірілді. Сонымен қатар, білім беру мекемесінің жылу жүйесінің қазандығы ауыстырылып, ағымдағы жөндеу жұмыстары жүргізілді. Заманауи шамдар орнатылып, қабырғалардың бір бөлігі қайта жаңартылған соң спорт зал да жарықтанып, көріктене түсті.
Жаңа оқу жылында балалар заман талабына сай жаңа мектепте оқитын болады, бұған ата-аналар қауымы ризашылығын білдірді.
Мектепте 80-ге жуық адам еңбек етеді. Оның 42-сі педагогикалық кадр, қалғаны қызметкерлер. 236 оқушы білім алады. Елу орындық шағын орталық жұмыс істейді.