Биыл облыста он мыңнан астам бүлдіршін бірінші мектеп табалдырығын аттады. Бір қуантарлығы, оқушылардың жетпіс пайызы қазақ сыныптарын таңдаған.
Жадыра ТӨЛЕГЕНҚЫЗЫ,
«Semeı tańy»
Облыста жаңа оқу жылында 102 349 оқушы контингенті бар 302 мектеп жұмыс істейді. Абай облысының санитарлық-эпидемиологиялық бақылау департаменті басшысының орынбасары Раушан Фатхуллинаның айтуынша, аймақта үш ауысымды мектеп жоқ, бірақ Ақсуат, Жарма аудандарында және Семейде апатты жағдайдағы 3 мектеп анықталған. Мектеп оқушылары басқа мекемелерде оқитын болады.
Биылғы оқу жылының ерекшелігіне тоқталатын болсақ, оқу жылы бұрынғыдай 25 мамырда аяқталмақ. Оқу жылының ұзақтығы 1-сыныптарда 33 оқу аптасын, 2-11 сыныптарда – 34 оқу аптасын құрайды. Білім беру мекемелері 5 күндік оқу жүйесінде жұмыс істейді. Осыған орай: педагогтерге жұмыс уақыттарын ұйымдастыруда «Педагогтің жұмыс уақыты мен демалыс уақыты режимінің ерекшеліктерін айқындау қағидаларын бекіту туралы» ҚР Білім және ғылым министрінің 2020 жылғы 21 сәуірдегі №153 бұйрығы басшылыққа алынады. Сенбі күні барлық білім ұйымдары ашық тұруы тиіс. Педагогтер мен оқушылар үшін қосымша сабақтар және сабақтан тыс жұмыстар жүргізуге толық жағдай жасалады.
— Оқыту қазақ тілінде жүргізілетін мектептердің 1-сыныбында «Әліппе», «Ана тілі» пәндері оқытылады, 2-сыныбында «Орыс тілі» пәнін оқыту басталады. Биыл 1-2-сыныптарда «Еңбекке баулу» және «Бейнелеу өнері» пәндері, 3-4 сыныптарда – «Көркем еңбек» кіріктірілген пәні енгізілді. Жоғары сыныптарда ағылшын тілінен оқу жүктемесі 1 сағатқа артады. Тағы бір жаңашылдық — негізгі орта (5-8-сыныптар), жалпы орта (10-сынып) білім беру деңгейлерінде академиялық жылды аяқтаған соң қазақ тілінен емтихан тапсыру енгізіледі. Сонымен қатар, экологиялық білім беру сапасын арттыруға баса назар аударылады,- деді Абай облысы білім басқармасының мектепке дейінгі, жалпы орта білім беру бөлімінің басшысы Макия Әмірханова.
Бөлім басшысының айтуынша, биылғы оқу жылында үлгерімі төмен оқушылармен жұмыс күшейтіліп, білім беру ұйымдарында тұтас тәрбие бағдарламасы енгізілмек. Домбыра тарту бойынша факультативтік курстар ұйымдастырылып, шахмат секцияларының желісін кеңейту бойынша жұмыстар жүргізіліп, мерейтойлар мен атаулы күндерге арналған сыныптан тыс іс-шаралар ұйымдастырылады.
— Ата-аналар қауымдастығымен өзара байланысты нығайту, «Ата-аналарды педагогикалық қолдау» орталығын құру көзделіп отыр. Педагогтерге арналған «Цифрлық кітапхана» жобасын жүзеге асыру, «Білім беруді өзгертудегі 1000 көшбасшы» республикалық кадрлық резервтің деректер қорын жасау жоспарлануда. «Үздіктен үйрен» жобасын іске асыру мақсатында «Үздік педагог» байқауы жеңімпаздарының озық педагогикалық тәжірибесін тарату жалғасын табады,- деді Макия Әмірханова.
Қауіпсіз ортаны қамтамасыз ету үшін барлық оқу орындарында бейнебақылау жүйелері мен дабыл түймелері орнатылған. Барлық оқушылар оқулықтармен толығымен қамтамасыз етілген.
Мектебі жоқ 132 елді мекеннен 2809 оқушы автобуспен тасымалданады.
1 қыркүйектен бастап 1-4 сынып оқушылары әлеуметтік статусына қарамастан тегін ыстық тамақпен қамтылады. Бұл бағытта жергілікті бюджеттен 1 279 668,0 мың теңге бөлінген.
Білім басқармасының басшысы Нұржан Ахметқалиевтің айтуынша, «Білімді ұлт» сапалы білім беру ұлттық жобасын орындау аясында биыл 408,2 млн. теңгеге 36 жаңа модификация кабинеті сатып алынған. 2023 жылы әлеуметтік осал отбасылардан шыққан 23158 оқушыны мектеп формасымен және кеңсе тауарларымен қамтамасыз ету үшін 941491,0 млн. теңге қарастырылып, әр балаға 40600 теңгеден ата-аналардың шотына аударылған.
Абай облысында «Жайлы мектеп» Ұлттық пилоттық жобасы аясында бір ауысымда 5700 оқушыға арналған 11 мектеп салу жоспарланған — Семей қаласында 3600 орындық 5 мектеп, Аягөз ауданында 900 орындық 2 мектеп, Ақсуат ауданында 600 орындық 2 мектеп, Бесқарағай ауданында 300 орындық 1 мектеп, Жарма ауданында 300 орындық 1 мектеп. Құрылысқа тапсырыс беруші-«Samruk-Kazyna Construction»АҚ.
Биыл бес мектептің – Семей қаласы Қарағайлы тұрғын ауданында 1200 орындық, Водный кентінде 600 орындық, Ақсуат ауданы Ақсуат ауылында 300 орындық, Бесқарағай ауданы Бесқарағай ауылында 300 орындық, Аягөз қаласының ет комбинаты шағын ауданында 600 орындық орта мектептің құрылысын бастау жоспарланған.
— Бүгінгі таңда дайындық жұмыстары жүргізіліп, жер жұмыстары басталды, қоршаулар және бейнебақылау орнатылды, — деді Абай облысы құрылыс, сәулет және қала құрылысы басқармасының Құрылыс бөлімінің басшысы Фариза Артықбаева.
2024 жылға 6 мектептің құрылысы — Семей қаласының Ақсай кентінде 600 орындық, Шығыс (оң жақ) кентінде 300 орындық, Қарағайлы тұрғын ауданында 900 орындық, Аягөз ауданы Ақтоғай кентінде 300 орындық, Ақсуат ауданының Екпін ауылында 300 орындық, Жарма ауданы Қалбатау ауылында 300 орындық орта мектептердің құрылысы басталады.
— «Жайлы мектеп» жобасы аясында салынатын мектептердің ерекшелігі – жаңа мектептерде бастауыш және орта сыныптар үшін бөлек блоктар болады. Олардың әрқайсысында робототехника кабинеттері, бірнеше зертхана, хореография залы, бастауыш сынып пен орта сынып оқушыларына, мұғалімдерге арналған үш коворкинг, инклюзивті білім беруді қолдау бөлмесі болады. Әр сынып интерактивті тақта және компьютерлермен жабдықталады,- деді Ф.Артықбаева.
