Абай облысының әкімі Нұрлан Ұранхаев «Қазақстан халқына» қорының өкілдерімен кездесті. Кездесуде денсаулық сақтау, әлеуметтік қолдау, білім беру, спорт және мәдениет салаларындағы өзекті жобалар талқыланды.
А.ӘБІЛ,
«Semeı tańy»
Аталған жобалар «Қазақстан халқына» қоры арқылы жүзеге асырылады. «Қор қысқа мерзім ішінде біздің облысымызда ауқымды жұмыстарды жүзеге асырды. Сол үшін өзіңізге қордан көмек алған жандардың атынан алғысымды білдіремін. Бүгінгі таңда біз бірлесіп жүзеге асырғымыз келетін жобалардың тізімін дайындадық. Олардың әрқайсысы қоғам сұранысына ие, ішінде уақыт күттірмейтін, жедел шешілуі тиіс мәселелер де бар. Қор мамандары өз тарапынан барлық жобаларды мұқият зерделеп, Абай облысы үшін лайықты шешімдер қабылдайды деп сенеміз»- деді аймақ басшысы Нұрлан Ұранхаев.
Қор денсаулық сақтау саласына 100 миллион теңгеден астам көмек көрсетті. Бұл медициналық мекемелерді заманауи құрал-жабдықтармен жабдықтауға, онкологиялық құрылғыларды шетелден әкелуге мүмкіндік берді.
Білім саласында да көптеген оң өзгерістер орын алды. Аягөз қаласындағы көпсалалы гимназияда 250 миллион теңгеге материалдық-техникалық база жаңартылды. Семей қаласындағы №6 мектеп-интернатының STEM кабинеті мен зертханасы заманауи құрал-жабдықтармен жабдықталды. Университет студенттеріне «Coursera» әлемдік білім беру платформасы қолжетімді болып, сабақ мазмұны қазақ тіліне аударылды. Ауыл оқушыларына арналған жазғы лагерьлер ұйымдастырылды.
Қоғамдық қор құрылған бір жарым жыл ішінде ірі компаниялар мен жеке қайырымдылық қорларынан 157 миллиард теңге түсті. Қаржының басым бөлігі науқас балаларды емдеуге жұмсалған.
— Әлеуметтік желілер арқылы еліміз бойынша 1 мыңнан астам үкіметтік емес ұйым өкілдері бізге қосылып жатыр. Біздің арнайы анкеталарымыз бар. Өңірлерде қандай проблемалардың бар екенін білу үшін жазбаша түрде де жинап жатырмыз, — дейді «Қазақстан халқына» қоры басқарма төрағасының орынбасары Ләззат Шыңғысбаева.
Қордың көмегімен Абай облысындағы бірқатар білім ордалары жаңа кейіпке енді. Бұл жұмыс әлі де жалғасады. «Қазақстан халқына» қоры Абай облысының шалғай ауылдарындағы 20-ға жуық мектептің спорт залын жаңғыртуға көмектеседі.
— Биыл Жарма ауданындағы Маяковский орта мектебі және Ақсуат ауданындағы бір мектеп 500 миллион теңгеге материалдық техникалық жағынан толық қамтамасыз етіледі. Болашақта қалған 5 аудан мен бір моноқаладағы алты мектепті тура осылай тірек мектептері негізінде жаңғыртқымыз келеді. Қор өкілдерінің назарына осы жобаны ұсынып отырмыз,- дейді Абай облыстық Білім басқармасының басшысы Нұржан Ахметқалиев.
Айта кетейік, қор Бородулиха ауданындағы өрт кезінде қаза тапқан орманшылардың отбасына жалпы сомасы 127 миллион теңге мөлшерінде материалдық көмек көрсетті.
Жиын барысында білім, еңбек және халықты әлеуметтік қорғау, дене шынықтыру және спорт, мәдениет, тілдерді дамыту және архив ісі, табиғи ресурстар және табиғатты пайдалану басқармалары өз жобаларын ұсынып, алдағы жоспарларымен бөлісті.
«Қазақстан халқына» қорымен бірлескен жұмыс әрі қарай да жалғасады. Қазіргі таңда өңірдегі өзекті мәселелерді шешу және мұқтаж жандарға қолдау көрсету мақсатында жаңа жобалар мен бастамалар әзірленіп жатыр.
