15 қыркүйек пен 15 қараша аралығында Қазақстанда алғашқы медициналық-санитариялық көмек ұйымына еркін тіркелу науқаны өтіп жатыр. Тіркеу науқаны кезінде азаматтар өзі тұратын аумақтағы мемлекеттік қана емес, жекеменшік емханаларға да тіркеле алады.
Асылхан САДАҚБАЕВ,
«Semeı tańy»
Бүгінгі таңда Әлеуметтік медициналық сақтандыру қорының денсаулық сақтау субъектілерінің деректер базасында Абай облысы бойынша 37 БМСК (Бастапқы медициналық-санитарлық көмек) ұйымдары, дәлірек айтқанда, 21 мемлекеттік, 16 жеке меншік медициналық ұйым тіркелген.
Бұл туралы өңірлік коммуникациялар қызметінде “Алғашқы медициналық — санитарлық көмек көрсететін ұйымдарға тіркелу” тақырыбында өткен баспасөз конференциясында айтылды.
Емханаға тіркелу жолдары өзгерген жоқ. Оның 2 түрлі тәсілі бар. Біріншісі – egov.kz электронды үкімет веб-порталы арқылы «Бастапқы медициналық-санитарлық көмек көрсететін медицина ұйымдарына тіркеу» қызметін таңдау керек. Ол үшін сайтта тіркеліп, ашылған бетті толтыру қажет. Осы ретте сізді қызықтыратын емхананың учаскелерінде бос орындардың бар-жоғын алдын ала нақтылап алған абзал.
Екіншісі – емханаға барып, өтініш жазу арқылы тіркелу. Айта кететін жайт, бұл тәсілді зейнеткерлер, мүгедектігі бар адамдар, бала кезінен мүгедектігі бар баланың заңды өкілдері, бас бостандығынан айыру орындарында жазасын өтеп жатқандар, студенттер, әскери борышын өтеп жатқандар, шетелде туған балалар, сенімхат бойынша тіркеуді ресімдейтіндер, жетімдер, сәбилер, қарттар үйіндегі жандар, ерікті және жүктелген медициналық сақтандыру шарты бойынша тіркелгендер пайдалана алады.
Сондай-ақ Абай облысы “ӘМСҚ” КЕАҚ филиалының директоры Ғалымжан Әбілов тіркеу науқаны емхананы ауыстырудың жалғыз мүмкіндігі емес екенін айтты. Қоныс аударса, жұмыс немесе оқу орнын, жазасын өтеу орнын ауыстырса, әскери борышын өтеу кезінде, медициналық мекеме жабылса, не қайта ұйымдастырылса, тіркеуде тұрған емхана қызметіне көңілі толмаған жағдайларда жылына бір рет еркін таңдау құқығы бойынша емхананы ауыстыруға болатынын атап өтті.
Азаматтарға жылына бір рет емхананы еркін таңдау құқығы берілгенімен, мамандардың маңызды кеңесіне құлақ асқан жөн болады.
“Емхана таңдауда басты ескеретін жайт – ол үйден 15-20 минут уақытта жаяу жететін жерде орналасқаны жөн. Барлық емхана аумақтық қағидат бойынша жұмыс істейді және пациент емхананың қызмет көрсету аумағында тұрған кезде ғана үйде медициналық көмек көрсетіледі. Бұл учаскелік дәрігердің немесе мобильді бригаданың көмегі қажет болған жағдайда оның жедел жетуіне, сондай-ақ, отбасы мүшелерінің бір дәрігерге қаралуына мүмкіндік береді”,- деді Абай облысы Денсаулық сақтау басқармасы басшысының орынбасары Гүлназ Таңатарова.
Осы орайда, таңдаған медициналық ұйымыңыз алғашқы медициналық-санитарлық көмек көрсетуге Әлеуметтік медициналық сақтандыру қорымен шарт жасасқан болуы тиіс. Мекемелердің тізімін Қордың fms.kz сайтында «Клиниканы таңдау» бөлімінен көруге болады.
“Емхана көмек көрсете алатын аумақтан айтарлықтай алыс жерде тұрсаңыз, ұсынған құжатыңыз дәйексіз болса, мекемеге тіркелушілер саны шектен асқан (учаскедегі жалпы тәжірибе дәрігеріне тіркелетін адам саны 1 700-ден аспауы керек) жағдайларда азаматтарды тіркемеуі мүмкін. Мұндай жағдайда құжаттарды жөндеуге және басқа емхана іздеуге тура келеді”,- деді Ғалымжан Нұржаубайұлы.
Емханасын ауыстырған қаралушы жаңа тіркелген жеріне 2024 жылдың 1 қаңтарынан бастап қарала алады. Бұрын тіркелген емхана азаматтарға жыл соңына дейін қызмет көрсетеді. Емхананы еркін таңдау құқығын пайдаланбаған адамадар бұрын өзі қаралған ұйымда тіркелген күйі қалады және олар бұрынғыша сол емханада қызмет алады.
