ӨРТ ҚАУІПСІЗДІГІ ЕРЕКШЕ НАЗАРДА

Үкімет отырысында Абай облысындағы жылу беру кезеңіндегі өрт қауіпсіздігі шаралары талқыланды.
2023 жылы облыста тұрғын үй секторында 433 өрт оқиғасы тіркелді. Өрт қауіпсіздігін күшейту жұмыстары олардың пайда болуының негізгі себептерін ескере отырып жүргізіледі. Орын алған өрттердің 40 пайызы отпен абайсызда жұмыс істеу кезінде, 30 пайызы электр жабдықтарын пайдалану кезінде өрт қауіпсіздігі ережелерін сақтамаудың нәтижелерінен, 19 пайызы жылыту пешінің ақаулығына байланысты және 11пайызы басқа факторлардың әсірінен пайда болған.
Осыған байланысты тиісті іс-шаралар жоспары іске асырылып жатыр. Өрт қауіпсіздігі айлығы өткізіліп, 2614 өрт қауіпсіздігі талаптарының бұзылуы анықталды, оның ішінде 1818-і автономды жылыту жүйелерімен байланысты.
Халықтың әлеуметтік осал топтары тұратын пешпен жылытылатын 7,5 мыңнан астам тұрғын үй анықталды. Аталған санаттағы азаматтардың үйлеріне көміртегі тотығын анықтауға арналған арнайы датчиктерді орнату кезең-кезеңімен жүргізіліп жатыр.
Бүгінге дейін 3,5 мыңнан астам датчик орнатылған. Қосымша тағы 4 мыңнан астам қондырғы орналастыру қажет.
«2023-2026 жылдарға арналған көміртегі тотығын анықтау датчиктерін сатып алу жоспары бекітілді, бүгінгі күні осы жоспарды мерзімінен бұрын орындау бойынша жұмыстар жүргізілуде. Сонымен қатар Семей қаласының бюджетін кезекті нақтылау кезінде көміртегі тотығы датчиктерін сатып алу үшін 25 млн теңге көлемінде бюджет қаражатын бөлу жоспарлануда», — деді аймақ басшысы Нұрлан Ұранхаев.
Өрт қауіпсіздігі мәселелері табиғи және техногендік сипаттағы төтенше жағдайлардың алдын алу және оларды жою жөніндегі арнайы комиссияның отырыстарында жүйелі негізде қаралады.
Сонымен қатар аталған тақырып бойынша халықты кеңінен ақпараттандыру, түсіндірме жұмыстарын жүргізу мақсатында әлеуметтік желілер мен бұқаралық ақпарат құралдары арқылы белсенді ақпараттық алдын алу жұмыстары жүргізіліп жатыр.
Абай облысы әкімдігі