Семей қаласында Zhas project жастарды қолдау жобасына қатысуға өтінімдерді қабылдау басталды. Өтінімдер 9-22 қазан аралығында қабылданады. Бір жобаға 1 миллион теңге қаржы беріледі. Бұл туралы Абай облысының өңірлік коммуникациялар қызметі алаңында өткен баспасөз мәслихатында айтылды
Сымбат ҚАЙРАТҚЫЗЫ,
«Semeı tańy»
Жастар және балалар ұйымдары ассоциациясының директоры – жобаның үйлестірушісі Эльзира Жүнісова және Абай облысы Жастар ресурстық орталығының директоры Айдос Төлеуханов жастардың өз идеяларын жүзеге асыруына мол мүмкіндік беретін бұл жобаға қатысу шарттары жайлы жан-жақты айтып берді.
Бұл жоба Семей қаласында 2018 жылдан бері жүзеге асырылып келе жатқандықтан, жергілікті жастардың көпшілігіне жақсы таныс. Гранттық бағдарлама жастарды қолдауға, олардың белсенділігін арттыруға және көшбасшылық дағдыларын дамытуға, сондай-ақ жастарды қоғамдағы әлеуметтік мәселелерді шешуге тартуға бағытталған.
Гранттық бағдарламаға 18 — 35 жас аралығындағы жастар қатыса алады. Республика бойынша барлығы 28 грант бөлінеді, оның 8-і Абай облысына тиесілі.
Zhas Project жобасының ең тиімді тұсы — жеңімпаз бір миллион теңге көлемінде мемлекеттік грант алып, өз ісін бастай алады және әр қатысушыға алты ай бойы 40-60 мың теңгеден шәкіртақы беріледі.
— Ескеретін жайт, конкурсқа қатысудың басты шарты — ұсынылатын жобалар әлеуметтік бағытта болуы қажет. Мысалы, жер учаскелері мен белгілі бір жабдықты сатып алуға арналған жобалар бағдарламаға қатыса алмайды, сондай-ақ ғылыми зерттеулер мен қолжазбалар жазуға да қолдау көрсетілмейді, — деді Эльзира Жүнісова.
Конкурста жұмыссыз жастарға, аз қамтылған отбасылардан шыққан, жетім және мүгедек адамдарға, мүгедек баланы тәрбиелеп отырған ата-аналарға, көп балалы отбасыларға, сондай-ақ «Алтын алқа» және «Күміс алқа» иелеріне басымдық беріледі.
Жоба жеңімпаздары 1 қарашада жарияланады.
— Жоба үш кезеңде жүзеге асырылады. Бірінші кезең – қатысушылардан өтінімдерді қабылдау және іріктеу, екінші кезең – кәсіпкерлік дағдыларға оқыту, тәлімгерлік қолдау, жобаларды іске асыру, ілгерілету және дамыту бойынша кеңес беру, үшінші кезең – Zhas project кәсіпкерлік апталығы шеңберінде форум өткізіледі, — дейді А. Төлеуханов.
Жобаға басынан аяғына дейін менторлар жетекшілік етеді. Олардың міндеті – грант ұтып алған жастарға әртарапты қолдау көрсету, бағыт-бағдар беру. Жеңімпаздар онлайн-тренингтен өтеді. Онда жұмысқа орналасу, әлеуметтік кәсіпкерлік, көшбасшылық сынды маңызды дағдыларды игереді.
Брифинг барысында жобаны іске асырудың негізгі тетіктері, гранттық конкурсқа және оқыту бағдарламасына қатысу шарттары түсіндірілді, сонымен қатар спикерлер БАҚ өкілдерінің сұрақтарына жауап берді.
