«AMANAT» партиясы Абай облысы филалынан арнайы жұмыс тобы қызметтік сапармен Бородулиха ауданына барып қайттық. Жұмыс тобының құрамында филиалдың атқарушы хатшысы Сейілбек Ысқақов, филиалдың партиялық бақылау бойынша инспекторы Майра Құржықаева, баспасөз қызметінің жетекшісі Эльмира Жүрсінбекқызы болды.
Жұмыс сапары аясында «AMANAT» партиясының «Халықпен бірге» атты 2023-2027 жылдарға арналған сайлауалды бағдарламасы негізінде әзірленген Жол картасының Бородулиха ауданында іске асырылу барысы туралы жауапты бөлім басшыларының ақпараттарын тыңдап, талқыладық.
Сондай-ақ «AMANAT» партиясының Бородулиха аудандық депутаттық фракциясы мен партиялық бақылау комиссияларының мүшелерімен кездесу өткізіліп, атқарылған жұмыстар туралы есептері тыңдалды.
Кездесу барысында партияның жұмысын жандандыруға және ауданны әлеуметтік-экономикалық дамуына үлес қосып жүрген азаматтарға партия филиалының атқарушы хатшысының алғыс хаттары табысталды.
Аудан орталығында салынып жатқан дене шынықтыру-сауықтыру кешенінің, Белағаш, Петропавловка ауылдарындағы мәдениет үйінің құрылысы мен су құбырын тарту жұмыстарының барысымен таныстық. Сондай-ақ Успенка орманшылығында болып, қызметкерлерімен жүздестік, сұрақтары мен өтініштерін тыңдадық. Биыл жазда өрт салдарынан қаза тапқан марқұмдардың туыстарымен, әріптестерімен кездестік.
Сонымен, ҚР ЭКОЛОГИЯ ЖӘНЕ ТАБИҒИ РЕСУРСТАР МИНИСТРЛІГІНІҢ НАЗАРЫНА!!!
Бородулиха ауданындағы Успенка шаруашылығында биылғы жылғы өртте қаза тапқан 15 орманшының әріптестерінің билікке өкпелері аз емес екен.
Рас, қаза тапқандар марапатталып, арттарында қалған жақындарына материалдық жәрдем көрсетілді. Ал оттың ортасынан өртенбей аман шыққандарға марапат та, материалдық қолдау да жоқ. Олардың бар айыптары тірі қалғандары ғана. Жасыратыны жоқ, «Көмек алу үшін міндетті түрде өлуіміз керек пе еді?» деген орманшылардың сөзін естіп қызарып, төмен қарадық…
Осы қайғылы оқиғадан кейін орманшылар мен өрт сөндірушілердің еңбекақысы 70-100 пайыз көлемінде көтеріліпті. Нақты айтқанда, бұрын 85 мың теңге алғандардың қазіргі еңбекақысы 130 мың теңге.
Іссапар барысында Жол картасы бойынша ашылған және құрылысы жүріп жатқан бірнеше нысанды араладық. Жұмыс барысымен танысып шыққан соң жұмыс тобы тарапынан тиісті нұсқаулар да берілді.
Биылғы жылдың Бородулиха ауданы үшін ауыртпалығы көп болғанымен, атқарылып жатқан жұмыстардың аз еместігін байқадық. Ауданға басшылыққа Айдар Маратұлы Ибраев дәл сол сын сағатта тағайындалған болатын. Жарма ауданында әкімнің орынбасары, облыстық мәдениет басқармасының басшысы қызметтерін атқарып, мемлекеттік қызметте шыңдалған азаматтың Бородулиханың өркендеуіне үлес қоса алатынына күмәніміз жоқ.
Риза АСАНҚЫЗЫ
