Ауыл халқының саны жыл өткен сайын азайып бара жатқаны жаңалық емес. Болашағы жоқ ауылдар қатарына кіріп жатқандардың басым көпшілігі — шағын елді мекендер. Ұлан-ғайыр жері бар, ежелден сайын далада мал өсіріп, ұлттық кәсібін өркендеткен халқымыз үшін ауылдардың азайып бара жатқаны – алаңдатарлық жағдай.
Сондай шағын елді мекендердің бірі — Абыралы өңіріне қарасты Айнабұлақ ауылы. Семей қаласының әкімі Нұрбол Нұрсағатов осы жолғы халықпен кездесуін ірі ауылдық округтерден емес, осы шағын елді мекен — Айнабұлақ ауылынан бастады. Ауыл мектебінің ғимаратында тұрғындарды жеке қабылдап, ауыл әкіміне тиісті тапсырмалар берді.
Биыл қалалық бюджеттен Айнабұлақ ауылына 66 млн 669 мың теңге бөлінді. Ағымдағы жылы бұқаралық спортты дамыту мақсатында жалпы сомасы 17 545 000 теңге қаржыға футбол алаңы орнатылды. Сондай-ақ Самай ауылында балалар ойын алаңын салуға қалалық бюджеттен 4 900 000 теңге бөлінді. «Еңбек-Өскемен» мердігерлік ұйымымен шарт жасалып, құрылыс жұмыстары аяқталды.
Округтегі өзекті мәселелердің бірі – сапалы интернеттің болмауы. Осы мақсатта қалалық бюджеттен 4 млн 200 мың теңге бөлініп, наурыз айында Айнабұлақ ауылы әкімдігі спутниктік интернет желісіне қосылды. Сондай-ақ Айнабұлақ пен Самай ауылдарына көше жарығын орнату мақсатында жер учаскесін дайындауға жобалау жұмыстарына 1 млн 200 мың теңге қаражат қарастырылып, арнайы құжаттама әзірленуде.
Қабылдау барысында қала әкімі тұрғындардың сауалдарына жауап берді.
«ST» — ақпарат
