Бейсенбі, 12 қазан күні өңірлік коммуникациялар қызметінде Абай облысының энергетика және ТКШ басқармасының басшысы Серік Туленбергеновтің қатысуымен жылу беру мәселесіне қатысты баспасөз
мәслихаты өтті.
Әйгерім СӘРСЕНҚАЛИ,
«Semeı tańy»
Облыс аумағында ауа температурасының төмендеуіне байланысты жылу беру 1 қазанда, ал Семей қаласында 10 қазан күні беріле бастады.
Басқарма басшысы Серік Төлегенұлының айтуынша, аймақта жылу беру маусымына дайындық кестеге сәйкес жүргізіліп жатыр.
— Жалпы, жылу беру маусымына дайындық жоспарға сәйкес жүргізілуде. Автономды қазандықтар, сумен жабдықтау желілері, су бұру желілері, білім беру нысандары, денсаулық сақтау объектілері жылуға қосылуға 100 пайыз әзір. Жылу желілерінің дайындығы 99,5 пайызды құрайды,- деді басқарма басшысы.
Абай облысында нысандарды орталықтандырылған жылумен жабдықтау Семей қаласындағы ЖЭО-1, РК-1, «Орталық» қазандығы және Бородулиха ауданындағы Жезкент кентіндегі қуаты 100 Гкал/сағ-тан асатын 4 ірі жылу көзімен және қуаты 100 Гкал/сағ-тан кем 40 жылу көзімен қамтамасыз етіледі. Бұдан басқа, облыс бойынша бюджеттік ұйымдарды жылумен жабдықтауға арналған 273 дербес қазандық бар.
Облыс бойынша жылу желілерінің жалпы ұзындығы 462 шақырым, оның ішінде Семей қаласындағы желілердің ұзындығы 322 шақырым. Желілердің жалпы тозуы 68 пайызды құрайды. Сонымен бірге жылу тапшылығы да орын алып отыр. Тозығы жеткен құбырларды ауыстыру, жылу тапшылығын жою мәселелері облыс басшылығының назарында тұр.
— Семей қаласының оң жағалауындағы жылу энергиясының тапшылығы сағатына 125,8 Гкал құрап отыр. Осы тапшылықты жою мақсатында ауқымды жұмыстар жүзеге асырылуда. Бүгінгі күні жалпы көлемі 23,9 млрд теңге қаржыға жылу желілері мен көздерін жаңғырту жұмыстары аяқталуға жақын қалды, оның ішінде 220 млн теңгеге жылумен жабдықтау желілерін салу, 1,7 млрд теңгеге екі жылу көзін жаңарту, 19,6 млрд теңгеге жылу желілерін жаңғырту бойынша сегіз жоба қолға алынған. Облыстың жылу көздері мен жылу желілерін ағымдағы жөндеуге 2,4 млрд теңге қаржы бөлінді,- деді басқарма басшысы.
Биыл Курчатов қаласында қазандықты жөндеу, жылу желілері мен түтін құбырын ауыстыру, Аягөз ауданында орталық қазандықты ағымдағы жөндеу, жылу желілерін ағымдағы жөндеу жұмыстары жүргізілді. Абай ауданында Қарауыл ауылын жылумен жабдықтау жүйесін күрделі жөндеу жұмыстары аяқталуға жақын.
Баспасөз мәслихатында тұрғындарды ауыз сумен қамту мәселесі де қозғалды.
— Халықты ауыз сумен қамтамасыз ету — еліміздегі ең маңызды мәселелердің бірі. Абай облысында орталықтандырылған сумен қамту 91,9 пайызды құрайды. Қалалардағы көрсеткіш 92,8 пайыз болса, ауылдық елді мекендерде 90,5 пайыз. Бүгінде облыстағы 327 елді мекенінің 35-і орталықтандырылған сумен қамтамасыз етілмеген, 154-і орталықтандырылған, 138-і жергілікті сумен жабдықталған. Басқаша айтсақ, облыстағы 610,189 мың тұрғынның 49,258 мыңға жуығы орталықтандырылған сумен қамтамасыз етілмеген,- деді Серік Туленбергенов.
Серік Туленбергеновтің айтуынша, «Қуатты өңірлер – ел дамуының драйвері» ұлттық жобасы аясында тұрғындарды таза ауыз сумен қамту мақсатында Абай облысына 15,5 млрд теңге бөлініп, су құбыры желілерін салу және қайта жаңғырту бойынша 54 жоба іске асырылуда.
— Биылғы жылы 20 жобаны іске қосу жоспарланып отыр. Нәтижесінде облысты орталықтандырылған сумен қамтамасыз ету үлесі 94,6 пайызға жетпек.
Бұдан басқа су құбыры желілерінде тозу деңгейін азайту мақсатында ұзындығы шамамен 220 шақырымнан астам сумен жабдықтау желілерін қайта құру бойынша 21 жоба әзірленуде,- деді С.Туленбергенов.
Сонымен қатар, жиында айтылғандай, Семей және Курчатов қалаларында кәріз-тазарту құрылыстарын жаңғыртуға жобалық-сметалық құжаттар әзірленіп жатыр. Жобаның іске асырылуы 2024-2026 жылдарға жоспарланған.
