Абай атындағы театрда Қазақстандағы мәдениет, әдебиет, өнер саласының талантты ұйымдастырушыларының бірі, көрнекті мемлекет және қоғам қайраткері Темірбек Жүргеновтің 125 жылдығын атап өту және жерлесіміз, белгілі актриса Әмина Өмірзақованың өнерін ел ішінде насихаттау мақсатында ұйымдастырылған «Ес-Аймақ» республикалық халықтық театрлар фестивалінің ашылу салтанаты өтті.
Сымбат ҚАЙРАТҚЫЗЫ
«Semeı tańy»
Абай облысының мәдениет, тілдерді дамыту және архив ісі басқармасының ұйымдастырылуымен өткізілетін шара екі күнге созылады. Ашылу салтанаты Абай атындағы театры бастаған артистер көрінісімен басталып, қызыл кілем жайылып, еліміздің әр қаласынан келген өнерпаздарымызды қошеметпен қарсы алды. Аталған конкурсқа еліміздің әр аймағынан 9 халықтық театр ұжымдары қатысады. Фестивальге Республиканың әр облысынан «Халықтық» атақтары бар бір театрдан қатысу бекітілген. Халықтық театрлар Алматы облысы, Батыс Қазақстан, Жамбыл, Ұлытау, Ақтөбе, Қызылорда, Шығыс Қазақстан, Абай облыстарының аудандарынан келген. Фестивальге қатысатын «Халықтық» театрлар ұзақтығы 40-45 минуттан аспайтын бір спектакль ұсына алады.
Посмотреть эту публикацию в Instagram
Сонымен қатар, Абай театрының кіші залында 17 қазан сағат 10:00-де Мәдениет саласының үздігі, сахна тілі маманы М.А.Алепарова актерларға шеберлік сағатын өткізсе, 11.00-11.30 – да театр фоесінде баспасөз конференциясы өтеді.
Сағат 17:30-да Абай атындағы қазақ музыкалық драма театры Бақыт Беделханның «Үш бәйтерек» — спектакль-концертімен тәмамдалып, 19:00-де фестивальдің жабылу салтанаты өтеді.
Фестиваль қорытындысы бойынша қатысушыларға «Ең үздік қойылым» – Гран-при жүлдесі; «Үздік режиссерлік жұмыс»; «Үздік әйел адам бейнесі»; «Үздік ер адам бейнесі»; «Актерлік ансамбльдік тұтастық» номинациялары; Темірбек Жүргенов атындағы сыйлық, «Әмина Өмірзақова атындағы арнайы сыйлық», «Облыс әкімінің арнайы сыйлығы» табысталатын болады.
Салтанатты шара жалғасы қаламыздағы Мәдениет сарайының әншілерінің дәстүрлі әндеріне ұласты. Жиынға театр, мәдениет саласының қызметкерлері, жастар,ьБАҚ өкілдері қатысты.
Естеріңізге сала кетейік, театрдағы фестиваль екі күн бойы 10:00 — ден кешкі 20:00 – ше дейін жалғасады. Рухани азық алып, жаныммен демалам деушілерге театр есігі әрдайым ашық!
