Әйгерім СӘРСЕНҚАЛИ,
«Semeı tańy»
Әр өңірдің халқы құрмет тұтатын, әрдайым туған елін естен шығармай, қамқорлық жасап жүретін азаматтар аз емес. Солардың бірі Ақсуат өңірінің тумасы — Бәделхан Сабуров.
Бәделхан Камалханұлы — елден жырақта жүрсе де қолдауды қажет ететін жерлестеріне қол ұшын созуға әзір тұратын жан. Ырғызбай Досқанаұлы атындағы қазақ күресінен дүниежүзілік Гран-при жарысын ұйымдастырушы.
Бәделхан Сабуровтың демеушілігімен Ақсуат ауылында жыл сайын мүгедектер мен жалғыз басты аналар, аз қамтылган отбасыларға соғым сойылып, таратылып беріледі. Аудан халқының Бәделхан Камалханұлына алғысы шексіз.
Таяуда Бәделхан Камалханұлына «Ақсуат ауданының Құрметті азаматы» атағы берілді.
***
Үржар аудандық Мәдениет үйінде ақын, ұстаз, атбегі, Қазақстан және Моңғолия Жазушылар одақтарының мүшесі Кәп Құмарұлының туғанына 90 жыл толуына орай «Алтай асқан ақтаңгер» атты еске алу шығармашылық кеші өтті. Аталған шараға аудан әкімінің орынбасары Біржан Тұрлыбеков қатысып, аудан басшылығы атынан құттықтау сөз сөйледі.
Осы кеште Кәп Құмарұлының ұлы — ақын, ҚР Жазушылар одағының Астана қаласы филиалының төрағасы Дәулеткерей Кәпұлына “Үржар ауданының Құрметті азаматы” атағы берілді.
Дәулеткерей Кәпұлы — 1977 жылы 9 тамызда Моңғолияның Баян-Өлгий аймағы, Баяннуур сұмынында дүниеге келген. Қазақстанның еңбек сіңірген қайраткері. Халықаралық «Алаш» әдеби сыйлығының, «Дарын» мемлекеттік жастар сыйлығының иегері.
