Абай облысы Бесқарағай ауданының прокуратурасы мемлекеттік мекемеде жұмыс істейтін «қайтыс болған адамды» анықтады. Бұл туралы Абай облысының прокуратурасының баспасөз қызметі хабарлады.
Айтолқын САМАТОВА,
«Semeı tańy»
Аудан прокуратурасы жүргізген талдау нәтижесінде 2015-2023 жылдар аралығында Бесқарағай ауданының жер қатынастары бөлімінің жүргізушісі ретінде жалған жұмысқа орналастыру фактісін анықтаған. Ағымдағы жылдың 15 тамызында аудан прокуратурасы бұл фактіні СДТТБТ-де тіркеп, қылмыстық істі тергеуді Абай облысының экономикалық тергеу департаментіне тапсырған.
Тергеу аяқталғаннан кейін ҚР Қылмыстық кодексінің 189-бабының 3-бөлігі — «Қызметтік жағдайын пайдалана отырып, ірі мөлшерде сеніп тапсырылған бөтен мүлікті ұрлау» бойынша бухгалтерге қатысты қылмыстық іс сотқа жіберілген.
Сот отырысы аудан орталығының мемлекеттік мекемелерінің бухгалтерлерінің қатысуымен ашық түрде өткен. Сотталушы «К.Н.» өз кінәсін мойындап, мемлекетке келтірілген 5 млн. теңге көлеміндегі залал тергеу сатысында өтелгенін түсіндірген.
12 қазан күні сот үкімімен «К.Н.» 3 жыл мерзімге материалдық-жауапты лауазымдарды атқару құқығынан айырылып, 2 жылға бас бостандығынан шектелді. Сот актісі заңды күшіне енген жоқ.
