Қазақстан Республикасының «Сайлау туралы» Заңына сәйкес және Курчатов қаласының аумақтық сайлау комиссиясы сайлауының қорытындысы нәтижесінде қала әкімі болып Болат Таңсықбайұлы Әбдіралиев сайланды.
Болат Таңсықбайұлы Әбдірәлиев 1976 жылы 20 мамырда Жамбыл облысының Тараз қаласында дүниеге келген. 1998 жылы М. Х. Дулати атындағы Тараз мемлекеттік университетін бітірген. Еңбек жолын 1998 жылы «Казфосфат» ЖШС-де машинист қызметінен бастаған Болат Әбдіралиев осы жылдар ішінде диспетчер, цех бастығының орынбасары, бірқатар кәсіпорындардың басшысы қызметтерін атқарды.
Әр жылдары Шымкент қаласындағы «ДО КНИСГ» ЖШС-де жетекші маман, Тараз қаласындағы «Арайстроймаркет 2003» ЖШС, «Сапар – Консалтинг» ЖШС, Алматы тұрғын үй» ЖШС-де басшының орынбасары, кейіннен басшы, «Nur Otan» партиясы орталық аппаратының активтер басқармасының, Абай облысының энергетика және тұрғын үй-коммуналдық шаруашылық басқармасының басшысы болды.
2023 жылдың 13 маусымынан бастап Абай облысы Курчатов қаласының әкімі.
«Болат Таңсықбайұлы қысқа мерзімде қаланың әлеуметтік-экономикалық дамуына өз үлесін қосты. Курчатовтың болашағы зор. Оның ғылыми әлеуетін Мемлекет басшысы лайықты түрде атап өтті. Қаланың дамып, азаматтардың тұруына қолайлы жағдай жасау үшін бірлесе жұмыс істейтін боламыз»,- деді өңір басшысы.
Аймақ басшысы Курчатов қаласының жаңа әкімінің жұмысына табыс тіледі.
Абай ауданының активімен кездесуде облыс әкімі Нұрлан Ұранхаев алғаш рет аудан және облыстық маңызы бар қала әкімдерінің сайлауы нәтижесінде сайланған ауданның жаңа басшысын таныстырды.
Қазақстан Республикасының «Сайлау туралы» Заңына сәйкес Абай ауданының аумақтық сайлау комиссиясының шешімінің негізінде Мейіржан Серікбосынұлы Смағұлов Абай ауданының әкімі лауазымына сайланды.
Мейіржан Серікбосынұлы Смағұлов 1987 жылы 13 сәуірде Абай ауданы Қарауыл ауылында дүниеге келген. 2008 жылы М.О.Әуезов атындағы Семей университетін, 2013 жылы Д.А. Қонаев атындағы Көлік және құқық-гуманитарлық университетін тамамдаған.
Мейіржан Серікбосынұлы еңбек жолын Абай ауданының кәсіпкерлік бөлімінде бас маман болып бастап, мемлекеттік қызметтің барлық баспалдағынан кезең-кезеңімен өтті.
Әр жылдары Абай аудандық жұмыспен қамту және әлеуметтік бағдарламалар бөлімінде, Абай ауданының статистика басқармасында жетекші маман, Абай ауданының жастар орталығында директор болды. 2017-2019 жылдар аралығында Қарауыл ауылдық округінің әкімі, 2019 жылдан бастап аудан әкімінің орынбасары қызметін атқарды.
Өңір басшысы Нұрлан Ұранхаев өткен сайлау демократиялық, әлеуметтік-құқықтық даму бағытын таңдаған ел дамуының жаңа кезеңін көрсететінін атап өттіп, жаңа әкімнің қызметіне табыс тіледі.
«Бұл – демократиялық, әлеуметтік, құқықтық бағытты таңдап алған еліміз үшін дамудың жаңа кезеңі екені сөзсіз. Күні кеше, 5 қарашада, ел тарихында алғаш рет 45 өңірде әкімдер сайлауы өтті. Қасиетті өңір тұрғындары өздерінің саяси мәдениетін көрсетіп, бірауыздан таңдауын жасады. Осы орайда сайлаудың жоғары дәрежеде өтуіне тікелей септігін тигізген барша аудан тұрғындарына ризашылығым мен алғысымды білдіремін», — деді облыс әкімі.
Жиын барысында Нұрлан Ұранхаев ауданның бұрынғы әкіміне еңбегі мен өңірдің дамуына қосқан үлесі үшін ризашылығын білдіріп, алдағы уақытта да өңірдегі жұмысын жалғастыратынын жеткізді.
«ST» — ақпарат
