Абай ауданының Саржал және Медеу ауылдық округтерінде интернет желісін қосу жұмысы аяқталды. Бүгінде Тоқтамыс, Архат, Орда ауылында желіні кеңейту жұмысы жалғасып жатыр.
Тоқтамыс ауылында 40 метрлік антенна-бағандық құрылғы орнатылды, оған 6 шақырым электр желісі тартылып, трансформаторлық қосалқы станса қойылды. Қазір электр желісіне қосу жұмыстары жүргізіліп жатыр.
Осы бағыттағы жұмыс Архат ауылында да іске асырылды. Яғни ауылда 40 метрлік антенна-бағандық құрылғы орнатылды.
Бұдан бөлек, Орда ауылында трансформаторлық қосалқы станцияны және 30 метрлік антеннаны орнату жұмыстары жалғасуда, 2,5 шақырымдық электр желісі тартылды. Жоғарыда аталған ауылдық округтерде барлық жұмыстарды жыл соңына дейін аяқтау жоспарланған.
Қарауыл, Кеңгірбай би, Қасқабұлақ, Көкбай, Құндызды ауылдары талшықты-оптикалық байланыс желісімен қамтылып, бұл елді мекендерде ұялы байланыс және интернет желісі жұмыс істейді.
Абай облысы әкімдігінің баспасөз қызметі
