Қырғыз Республикасының астанасы Бішкек қаласында 2023 жылы 11-12 желтоқсанда әлемдік әдебиет классигі, философ және гуманист Шыңғыс Төреқұлұлы Айтматовтың 95 жылдығына арналған «Айтматов оқулары» атты Халықаралық ғылыми-әдістемелік кеңес өтеді.
Ғылыми форумның ұйымдастырушылары Ресей Федерациясының ғылым және жоғары білім министрлігінің қолдауымен Мәскеу мемлекеттік лингвистикалық университеті және Б. Н. Ельцин атындағы Қырғыз-Ресей Славян университеті.
Іс-шара «ТМД елдерінің мәдени кеңістігінде және әлемдік көркем мәдениетте Шыңғыс Айтматов шығармашылығына пәнаралық ғылыми-білім беру тәсілдерінің жүйесін әзірлеу» жобасы шеңберінде іске асырылады, оның мақсаты ТМД-ға қатысушы мемлекеттерде жоғары әлеуметтік-гуманитарлық білім беру жүйесін ғылыми-әдістемелік қолдаудың үздік тәжірибелерін сараптамалық талқылау және қорыту болып табылады.
Бішкекте өтетін «Айтматов оқуларына» ТМД елдерінің түрлі қалаларынан жетекші лингвистер, әдебиеттанушылар, философтар, журналистер, мәдениеттанушылар, аудармашылар, тарихшылар, қоғамдық ұйымдардың өкілдері қатысады.
«Айтматов оқуларының» жұмысына қазақстандық ғалымдар: әл-Фараби атындағы Қазақ ұлттық университетінің профессоры Н. Ж. Шаймерденова, Қазақстан Республикасы Ғылым және жоғары білім министрлігі Ғылым комитетінің М. О. Әуезов атындағы әдебиет және өнер институтының әлемдік әдебиет және халықаралық байланыстар бөлімінің меңгерушісі, Қазақстан Жазушылар одағы басқармасының мүшесі С. В. Ананьева, Astana IT University жалпы білім беру пәндері департаментінің қауымдастырылған профессоры Ж. Д. Маликова, ЖШС «Шоқан Уәлиханов атындағы жеке мектебінің» педагог-зерттеушісі А. А. Амитовалар белсенді қатысады.
Ғылыми форум жұмысы ғылыми, ағартушылық және мәдени үш блок бойынша жүреді.
Сонымен қатар, «Айтматов оқулары» аясында қазіргі заманғы пәнаралық тәсілдер мәнмәтінінде классик мұрасын насихаттауға бағытталған «Ш.Т. Айтматовтың Фразеологиялық әлемі» атты ғылыми-әдістемелік басылымының жаңа редакциясының тұсаукесері өтеді.
Мусабекова Ұ.Е., Саденова А.Е.
