Желтоқсан айының 5-ші жұлдызы – Халықаралық еріктілер күні. Осыған орай апта сейсенбісінде Семейдегі Бизнес және сервис колледжінде қалалық әкімдіктің ішкі саясат бөлімі, Жастар ресурстық орталығының ұйымдастыруымен «Кең жүрекпен» атты дәстүрлі еріктілер форумы өтті.
Әлібек КЕМЕЛХАН,
«Semeı tańy»
Форумға қаламыздағы жоғары оқу орындары мен барлық арнаулы білім беретін колледждер жанынан құрылған еріктілер ұйымдарының мүшелері, қоғамдық өмірде белсенді жастар, оқытушылар мен студенттер жиналды. Волонтерлер өздерінің жыл бойы атқарған жұмыстарын қорытындылап, тәжірибелерін бөлісті.
Форум басталар алдында еріктілердің жыл бойы атқарған жұмыстарын қамтитын деректі фильм көрсетілді. Былтырғы қаһарлы қыстың аязды күндерінде көше тазалаушыларға ыстық шай мен самса таратудан бастап жаздағы орман өрті кезіндегі еріктілердің ерлік істері паш етілді.
Жастар форумында Семей қалалық ішкі саясат бөлімінің басшысы Нұржан Есенжолов, Абай облысы білім басқармасының инновациялық-әдістемелік орталығының бөлім басшысы Сейілғазы Бласпаев, Семей қалалық Жастар ресурстық орталығының директоры Ерсінбек Өрлеубек сөз алды.
Форумды кіріспе сөзбен ашқан Нұржан Ерғалиұлы еріктілер қызметінің қазіргі қоғам үшін маңыздылығына тоқталды.
— Құрметті жастар, қадірменді волонтерлер! Бірінші кезекте сіздерді Халықаралық волонтерлер күнімен құттықтаймын! «Волонтер» — ағылшын тілінен енген мағынасы өте терең сөз. Волонтер деп біз өз уақытымен, өз жағдайымен санаспай, қашан болмасын мұқтаж жандарға көмек көрсетуге даяр тұратын жандарды атаймыз. Бұл — өте жауапты жұмыс. Екінің бірі ерікті бола алмайтынын біз білеміз. Жан жылуын, жүрек жылуын басқа адамдармен бөлісе білу — өте керемет қасиет, — деді қалалық ішкі саясат бөлімінің басшысы.
Нұржан Есенжолов биылғы жазда орын алған орман өрті кезінде еріктілер жұмысының қымбатқа түскенін де айтып өтті. Бұл орайда табиғат апаты кезінде үлкен көмек көрсеткен семейлік еріктілердің еңбегін жоғары бағалайтынын айтты.
Форум барысында қоғам игілігі жолында қолдан келген көмектерін аямай, жыл бойы мұқтаждарға көмек көрсетіп жүрген еріктілер салтанатты түрде марапатталды. Атап айтсақ, қоғамдық-әлеуметтік іс-шараларда ерекше белсенділігімен танылған бірқатар арнаулы және жоғары оқу орындарының волонтерлері — Д.Қалматаев атындағы жоғарғы медицина колледжінің және Электротехникалық колледждің «Ашық жүрек» еріктілер тобы, Семей медицина университетінің, Alikhan Bokeikhan университетінің «Ақ ниет», Көлік колледжінің «Ашық жүрек», Р.Байсейітов атындағы Семей қаржы-экономикалық колледжінің «Қайырымды студенттер», Ж.Шайжүнісов атындағы Электронды колледждің «Жан жылуы», Агробизнес және экономика колледжінің «Кең жүрек» еріктілер ұйымы алғыс хат иеленді.
Марапаттау рәсімінен соң қаламыздағы Мұқан Төлебаев атындағы музыкалық колледждің студенттері әзірлеген концерттік бағдарламаға кезек берілді.
Сөз соңында айта кетсек, Жастар ресурстық орталығының мәліметінше, бүгінгі таңда Семей қаласында 30-ға жуық волонтерлік ұйым жұмыс істейді екен. Олардың көпшілігі — колледждер мен жоғары оқу орындарының студенттері. Сонымен қатар қала мектептерінде де еріктілер тобын құру ісі қолға алынып жатыр.
Семейлік еріктілер қарттарға, мұқтаждар мен мүгедектерге көмек көрсетіп қана қоймай, көптеген қоғамдық іс-шараларды өткізуге мұрындық болып жүр. Сонымен қатар олар көрші облыстардағы табиғат апаттары кезінде де қол ұшын созды.
«Үш-ақ нәрсе адамның қасиеті – ыстық қайрат, нұрлы ақыл, жылы жүрек»,- деп Абай хакім айтып кеткендей, қайырымдылық, ізгі іске ұйытқы болу бүгінгі жастардың бойындағы ең асыл қасиет екені анық.
