Гендерлік саясатты дамыту, әйел мәртебесін көтеру, қоғамдағы рөлін айқындау, отбасылық және тұрмыстық зорлық-зомбылықтың алдын алуға жәрдемдесу мақсатында «АМАNАТ» партиясы облыстық филиалы жанынан әйелдер қанаты құрылды.
Сымбат ЖАЙСАНБЕКОВА,
«Semeı tańy»
Жаңа ұйымның ашылуына орай, партия филиалының ұйымдастыруымен «Қоғам дамуындағы әйелдің рөлі» тақырыбында форум өтті.
Жиынға Абай облысы әкімінің орынбасары Ш.Байбеков, «AMANAT» партиясы Абай облысы филиалының төрағасы Қ.Сүлейменов, партия филиалының атқарушы хатшысы С.Ысқақов қатысты. Өңірдегі саясат, білім, денсаулық сақтау, мәдениет, кәсіпкерлік, үкіметтік емес ұйымдарда табысты қызмет етіп келе жатқан нәзік жандылар да жиынның бел ортасынан табылды.
Басқосуда алғаш болып сөз алған «AMANAT» партиясы облыстық филиалының төрағасы Қуаныш Сүлейменов жаңадан құрылған ұйымның мақсаты әйел мәртебесін көтеру, олардың қоғамдағы рөлін айқындау, нәзік жандылардың ғылыммен айналысуларына жағдай жасау, кәсіпкер әйелдерге қолдау көрсету екенін атап өтті.
— Астана қаласында өткен «AMANAT» партиясының әйелдер форумында партия төрағасы Е.Қошанов қатысушылардың партияда әйелдер қанатын құру туралы ұсыныстарын қолдаған болатын. Бүгінде облыс тұрғындарының 51 пайызын әйелдер құрайды. Абай облысы бойынша «AMANAT» партиясы мүшелерінің 69,6 пайызы — әйелдер. 137 бастауыш партия ұйымы жетекшілерінің 66-сы — әйелдер. Облыстағы барлық деңгейдегі мәслихаттарда 124 мандаттың 34-не әйелдер ие. Олар тек басшылар, кәсіпкерлер ғана емес, ел өміріне белсене араласып жүрген қарапайым әйелдер, аналар, – деді Қ.Сүлейменов.
Басқосуда әйелдердің мәртебесін көтеру, қоғамдағы белсенділігін арттыру мәселесі жан-жақты талқыланды. Партияның облыстық филиалы саяси кеңесі бюросының шешімімен, әйелдер қанатының кеңесшісі болып кәсіпкер Әйгерім Смағұлова тағайындалды.
Жиында әйелдер қанаты жұмысының мақсат-міндеттері мен жоспарлары баяндалды. Ұйым 10 бағыт бойынша жұмыс істейтін болады.
Басқосуда сөз алған облыстық мәслихат депутаты Р.Молдашева өңірде әйелдерді қолдау мақсатында қолға алынған бастамалар жайында айтып өтті.
— Биыл Әйелдер істері және отбасылық-демографиялық саясат жөніндегі ұлттық комиссияның мүшесі Ләззат Сүлейменмен бірге Абай, Бесқарағай, Жарма, Бородулиха аудандарын аралап, әйелдердің жағдайымен таныстық. Бір байқағанымыз, нәзік жандылар мемлекеттік басқару ісіне белсенді араласып, кәсіпкерліктің де шыңын бағындыруда. Мемлекеттің қолдауынсыз-ақ өз кәсібін дөңгелетіп отырған қыз-келіншектер жұмыссыздардың санын азайтуға үлес қосып жүр. Осындай әйел азаматтарға мемлекет тарапынан үлкен қолдау жасалу керек,- деді Р.Молдашева.
Абай облысы мәслихатының депутаты, партиялық бақылау комиссиясының мүшесі А.Маслова әйелдер қанаты жұмысының 10 басым бағытына тоқталып, ұйымның мақсат-міндетімен, алдағы жоспарлармен таныстырды.
Жиын соңында партия филиалының төрағасы Қ.Сүлейменов қатысушыларды әйелдер қанатының жұмысына атсалысуға шақырды.
