Өткен аптаның соңында Қазақстан Республикасының Ұлттық экономика вице-министрі Бауыржан Құдайбергенов Абай облысына арнайы жұмыс сапарымен келіп, облыс орталығындағы бірқатар нысандарда болды. Шаһардың іргелі өндіріс орындарымен және жылу беру маусымының өту барысымен кеңінен танысты.
Әлібек КЕМЕЛХАН,
«Semeı tańy»
Атап айтсақ, Бауыржан Құдайбергенов ең әуелі Семей қаласындағы «СемАз» ЖШС өндірісінде болып, кәсіпорынның заманауи тұрғыда жарақтандырылуымен, өндіріс процесімен, онда құрастырылып жатқан ауыл шаруашылығы және жүк көліктері сынды жаңа техникалардың түрлерімен танысты. Бүгінгі таңда кәсіпорнының алға қойып отырған мақсаты — Қазақстан Республикасында бәсекеге қабілетті автомобильдер шығару және Қазақстан халқының және жақын елдердің бір бөлігінің қажеттіліктерін қамтамасыз ету, автомобиль өнеркәсібін дамыту. Бұл орайда өндіріс ошағындағы жұмыс барысына қаныққан Бауыржан Әлібекұлы зауыт серіктестерінің арасында әлемдік жетекші концерндердің де бар екендігіне назар аударды.
Сонымен қатар вице-министр Семей қаласындағы бірқатар әлеуметтік маңызы жоғары нысандарды — «Зооветинститут», «35 квартал» сынды жылу қазандықтарын, №11 орта мектептің апатты жағдайда тұрған ғимаратын да аралап шықты.
Сапар барысында Ұлттық экономика вице-министрі Бауыржан Құдайбергенов мемлекет тарапынан қолға алынған «Ауыл – ел бесігі» бағдарламасы аясында жүзеге асырылған жобалардың сапасын да бағалады. Атап айтқанда, мәртебелі мейман Бесқарағай ауданы Бесқарағай ауылында болып, ондағы балабақшаға барды. Аталмыш жобаның жалпы құны 96 млн теңгені құрайды. Нысан бүгінде қолданысқа берілген.
Жалпы, өткен жылы мемлекеттік «Ауыл — ел бесігі» бағдарламасы бойынша Абай облысының 42 ауылында жоспарлы түрде қолға алынған 76 жобаны іске асыруға 8,5 млрд теңге бөлінген болатын. Бұл бағыттағы жұмыстар алдағы уақыттарда да жүзеге асырыла бермек. Мәселен, келесі жылы 7,8 млрд теңгеге 101 жобаны іске асыру жоспарлануда.
Бұдан бөлек, вице-министр Бауыржан Әлібекұлы аудандағы бірегей кәсіби білім беретін орын Бесқарағай колледжінде де болды. Білім ордасының ғимаратында жергілікті тұрғындармен арнайы кездесу өткізді. Шараға қатысушылар аудан орталығындағы көптеген әлеуметтік нысандарды жөндеу және жаңадан салу, ауылішілік жолдарды қалыпқа келтурі сынды өзекті мәселелерді көтерді.
Вице-министр кездесуге келген азаматтар көтерген барлық мәселелер мен ұсыныстар міндетті түрде қаралатынын атап өтті.
