Бүгін, 27 желтоқсан күні Абай облысы мәслихатының кезектен тыс он екінші сессиясы өтті. Сессия жұмысына облыс әкімі Нұрлан Ұранхаев, облыстық мәслихаттың төрағасы Қуаныш Сүлейменов және халық қалаулылары мен БАҚ өкілдері қатысты.
Күн тәртібінде Абай облысының аумақтық сайлау комиссиясының мүшелерін сайлау, «Абай облысы Құрметті азаматы» атағын беру, Абай облысын басқару жүйесіне өзгерістер енгізу мәселелері қаралды.
Әйгерім СӘРСЕНҚАЛИ,
«Semeı tańy»
Алғашқы сауал, аумақтық сайлау комиссиясының мүшелерін сайлау бойынша Абай облысы мәслихатының «Экономикалық және қаржылық, кәсіпкерлік қызметті дамыту» саласындағы тұрақты комиссияның төрағасы Рафаил Хазипов патиялар мен қоғамдық бірлестіктерден ұсынылған 7 үміткерді таныстырды.
Келесі ретте облыстық қоғамдық даму басқармасының басшысы Айдар Садырбаев «Абай облысы Құрметті азаматы» атағына ұсынылған, өңірдің әлеуметтік-экономикалық дамуына үлес қосқан 10 азаматты таныстырды. Олардың қатарында опера әншісі, ҚазССР және КСРО халық әртісі,«Мирас» қоғамдық ұлттық мәдениет қорының вице-президенті Бибігүл Төлегенова, еңбек ардагері, зейнеткер Қожағұл Тоқабаев, жазушы, ҚР жазушылар одағының мүшесі Медеу Сәрсеке, облыстық қоғамдық кеңестің төрағасы, Семей қаласының әкімі болған Мейрамхат Айнабеков, тыл және еңбек ардагері Хапас Уақасұлы Дәуітов, тыл және еңбек ардагері Дүйсен Сұлтанов, «Возрождение» неміс қоғамдық бірлестігінің белсендісі Артур Эккарт, спорт ардагері Ром Ильматов, еңбек ардагері Маркен Шайжүнісов, журналист, «Тема недели» бағдарламасының авторы Вера Кропачева бар.
Соңғы сауал, облыстың басқару жүйесіне өзгеріс енгізу бойынша ақпарат берген облыс әкімі аппаратының басшысы Жасулан Сәрсебаев жаңадан Жұмылдыру дайындығы басқармасын, Дін істері басқармасын және Цифрлық даму басқармасын құру және қазігі Қоғамдық даму басқармасының атауын «Абай облысы ішкі саясат басқармасы» деп өзгерту туралы облыс әкімдігінің шешімін ұсынды. Депутаттық корпус күн тақырыбында талқыланған мәселелерді бірауыздан қолдап, дауыс берді.
Сессия соңында сөз алған аймақ басшысы Нұрлан Тельманұлы:
— Өткен жылға өкпе жоқ. Облысымыз барлық көрсеткіштер бойынша республикада үздіктер қатарында болды. Біз әр бастамамызда өздеріңізбен келісе отырып, жүзеге асырдық. Бұл үрдіс келешекте де жалғасын табуы тиіс деген ойдамын. Халық сенім артты, сол сенімді ақтау міндет,- дейе келе халық қалаулыларының жемісті еңбектері үшін ризашылығын білдіріп, келе жатқан Жаңа жылмен құттықтады.
