Бүгін еліміздің бас газеті ««Egemen Qazaqstan» беттерінде Ел Президенті Қасым-Жомарт Кемелұлының «Біз озық ойлы ұлт ретінде тек қана алға қарауымыз керек» деген сұхбаты жарияланды.
Ертесімен газет сайтының сілтемесін бір-бірімізге жолдап, әріптестерімізбен пікірлесе отырып, Президент сұхбатын ерекше ықыласпен оқып шықтық.
Елдегі саяси ахуалдан бастап сыртқы қатынастар, экономикалық өсу, қаңтар сабақтары мен қоғамымыздың болашақ бағыт-бағдары туралы ой қозғаған Президенттің өзіне тән байыптылықпен, нақтылықпен, көтерілген әрбір тақырыпты ашық, айқын талқылағаны ерекше сүйсінтті. Сұхбат алған Дихан Қамзабекұлы айрықша бір аурамен Президентті ашық әңгімеге тартқаны бірден көрінеді.
Сұхбат барысында Президент мырза көп мәселені қозғайды. Ішкі және сыртқы саясат, Қазақстанның әлемдегі, оның ішінде Орта Азиядағы орны, ел экономикасының дамуы, алға қойған мақсат-міндеттер мен келер жылдар еншісіндегі елеулі істер – барлығына қатысты байыпты жауаптарын береді. Соның ішінде саналы ғұмырымызды ғылымға, жастармен
жұмысқа, білім беру саласына арнаған біздер үшін Президенттің «озық ойлы ұлт» туралы ойлары ерекше құнды.
Президент өз сөзінде: «Біз өткенді аңсаумен өмір сүрмеуіміз керек. Керісінше, келешегімізді кемел етуге ұмтылып, ұлттың ұлылығын нақты іспен дәлелдеуге тиіспіз. Дүниетанымымызға жат мәдениеттерге көзсіз еліктеуден, жалған патриотизмнен, даңғойлық пен дарақылықтан сақтануымыз керек. Халқымыздың бойындағы кемшіліктерге көз жұма қарамай, одан арылуымыз қажет. Мұның бәрі күн сайын құбылған тұрлаусыз заманда өмір сүріп жатқан Қазақстанның келешегі үшін айрықша маңызды.
Сондықтан ұлтымыз өсіп-өркендесін десек, біз жақсыдан үйреніп, жаманнан жирене білуіміз керек. Қоғамда еңбекқорлық пен жасампаздық жоғары бағалануға, білімпаздық пен жаңашылдық салтанат құруға тиіс. Сондай-ақ өмірге деген байсалды және байыпты көзқарас басым болғаны жөн»,- деп қадап айтады.
Жастардың жалған идеялар мен қараңғы сенім, көзсіз радикализм мен надандыққа ұрынып қалып жатуы Президентті қатты алаңдататыны айқын көрінеді.
«Біз озық ойлы ұлт ретінде халқымызды ыдырататын емес, біріктіретін жолды таңдап, тек қана алға қарауымыз керек. Жалпыұлттық құндылықтар бәрінен жоғары тұруға тиіс. Бұл туралы үнемі айтып жүрмін. Тағы да қайталаймын, еңбекқорлық, білімпаздық, кәсібилік, бірлік, ынтымақ, жанашырлық, іскерлік, бастамашылдық, адалдық, қарапайымдылық және үнемшілдік – нағыз отаншыл, адал азаматқа тән қасиеттер мен құндылықтар. Халқымыздың қуатын арттырып, табысқа жетелейтін осындай қасиеттер мен құндылықтарды жан-жақты дәріптеп, ұрпақ санасына сіңіру арқылы ғана сапалы ұлтқа айнала аламыз», — дейді Қасым-Жомарт Кемелұлы.
Бұдан артық қандай бағыт-бағдар, қандай ақылөсиет керек жалындаған жастарымызға? Қазақ қоғамының прогрессивті, дамыған, озық ойлы ұлт ретінде қалыптасуы ел алдында тұрған басты мұрат екені сөзсіз.
Бұл ретте біздер – академиялық орта мамандары, ғалымдар мен ұстаздар — Президенттің осы бір тапсырмаларын ерекше ыждағатпен қабылдаймыз. Біздерге артылатын жауапкершілік те мол. Сол себепті бүгін мен әріптестеріме қарата айтқым келеді: қазақ жастарын көзі ашық, озық ойлы етіп тәрбиелеуге бар күшімізді салайық! Ел Президентінің сенімін ақтауға, алға қойған міндеттерін орындауға бір кісідей ат салысайық! Бірлігіміз мығым, бірлескен еңбегіміз елеулі болған жағдайда ғана, Президент айтқан әділетті мемлекет, біртұтас ұлт және берекелі қоғам қалыптастыра алмақпыз!
Шырын ҚҰРМАНБАЕВА,
Alikhan Bokeikhan University президенті, саяси ғылымдар докторы, профессор
