Апта бейсенбісінде Қазақстан Республикасы Парламенті Мәжілісінің депутаттары Нұртай Сабильянов, Ринат Зайытов және ҚР Парламенті Сенатының депутаты Айнұр Арғынбекова Абай облысына жұмыс сапарымен келді.
Жадыра ТӨЛЕГЕНҚЫЗЫ,
«Semeı tańy»
Ринат Рифхатұлы сапарын Абай ауданынан, Айнұр Серікпайқызы Жарма ауданынан бастады. Ал Нұртай Салихұлы алдымен Семей қаласына келді. Халық қалаулысы қаладағы ЖЭО-1-де болып, соңынан «AMANAT» партиясының облыстық филиалында қоғамдық қабылдау өткізді.
1-жылу электр орталығында болған Нұртай Салихұлы нысанда жүргізілген қайта құру және жаңғырту жұмыстарымен танысты. Бұл орталық қаладағы 362 көп қабатты үйді, 30 әлеуметтік нысанды, 55 бюджеттік мекемені және 564 кәсіпорынды жылумен қамтамасыз етуде. 2023 жылы Семей қаласының жылу жүйесін жаңартуға 23,9 млрд теңге қаржы бөлінген.
Қазақстан Республикасы Парламенті Сенатының депутаты Айнұр Арғынбекова Жарма өңіріне жұмыс сапары барысында аудан әкімі Жарқынбек Байсабыровпен және облыстық мәслихат депутаттарымен бірге Қалбатау ауылындағы екі білім беру мекемесіне барды. Сенат депутаты аудан орталығындағы Георгиевка орта мектебінің материалдық-техникалық жабдықталуымен таныса келе білім беру мекемесі қайта жаңғыртуды қажет етіп тұрғанына көз жеткізді.
Осыдан соң депутат күрделі жөндеуден өткен Маяковский орта мектебін аралап, онда жаңа оқу жүйесін енгізу барысымен танысты.
Бұдан кейін аудандық мәслихат депутаттарымен кездесті. Әңгіме барысында Айнұр Серікпайқызы Қазақстан Республикасы Парламенті Сенатының заңнамалық қызметі, оның ішінде заң жобаларын қарау тәртібі туралы айтты. Сенаттың негізгі міндеттерінің бірі өңірлердің дамуына қолдау көрсету екенін атап өтті.
— Сенаторлардың мәслихат депутаттарымен тығыз қарым-қатынасы — орын алған мәселелерді шешудің тиімді жолы, — деді Айнұр Арғынбекова.
Кездесу барысында заңсыз қазба жұмыстарының экологияға зиянды әсері және оны қалыпқа келтіру, көлік салығы, көлік құралдарын кедендік рәсімдеу, МӘМС жарналары, Шар қаласындағы жастарға арналған жеңілдіктер, шикізатты қайта өңдеу, ауылдардан қоқыс шығаруға қатысты мәселелер талқыға салынып, тиісті министрліктерге депутаттық сауалдар дайындалды. Көтерілген мәселелер заң шығару қызметінде назарға алынатын болады.
