Елдің тыныштығын қамтамасыз етіп, тәртіпті қадағалайтын учаскелік инспекторлардың жүктемесі көп, міндеті ауыр. Құқық қорғау органдарының имиджін халықпен тығыз жұмыс істейтін осы сақшылардың қалыптастыратындығы анық. Бұл ретте Мемлекет басшысы Қасым-Жомарт Тоқаев «Жұртқа жақын полиция» қағидасы бойынша учаскелік инспекторлардың жұмысын реформалауды тапсырған болатын. Бүгінгі біздің мақаламыз еңбектің жалауын жықпай, тұрғындардың қауіпсіздігін қадағалау үшін алтын уақытын сарп етіп жүрген инспектор жайлы болмақ.
2010 жылдан бері қызмет етіп келеді. Алғашқы еңбек жолын патрульдік полиция батальонының инспекторы қызметінен бастаған. 2019 жылы Затон полиция бөлімінің учаскелік полиция инспекторы лауазымына тағайындалып, қазіргі күнге дейін сол жерде жұмыс істейді. Семей қаласының әкімі Нұрбол Нұрсағатов Дулат Абдрахмановтың елеулі еңбегін назардан тыс қалдырмай, 2023 жылы “Қалаға қосқан үлесі үшін” мәртебелі төсбелгісін табыс еткен болатын.
Қарағайлы ықшам ауданы тұрғындарының айтуынша Дулат Абдрахманов күн сайын өз ауданының тұрғындарымен тікелей байланыста болып, аумағында 18 мыңнан аса адам тұратын Қарағайлы шағын ауданында қоғамдық тәртіпті сақтауды қамтамасыз етеді.
-Дулат өзінің тікелей қызметтік міндеттерін атқарумен қатар, өзінің әкімшілік учаскесінің қарт тұрғындары мен балаларына ерекше назар аударады. Оларға қолынан келгенше көмегін көрсетіп жүр. Сондай-ақ, Жаңа жылда басқада мейрамдарда учаскелік инспектор көпбалалы отбасылардың балалары үшін балалар ойын алаңында шағын мереке ұйымдастырып, ол жерде ойындардан басқа балаларды дәмді тағамдар мен сыйлықтармен қуантып жүреді, дейді қарағайлы тұрғыны Сәуле Кенжебайқызы.
Дулат Абдрахмановтың айтуынша, жұмыстың қызығы да қиыншылығы да қатар жүреді. Халыққа қолұшын созып сауапты іс жасағанымен, отбасын, бала-шағасын сирек көреді.
-Құдай қосқан қосағым мен балдан тәтті 3 балапаным бар. Күніміздің басым бөлігі жұмыста өтетіндіктен оларды сағынамын. Бірақ біреуге титтей де пайдам тиіп, ақ жаулықты әжелердің батасын алып жатқанда бұл бағытты бекер таңдамағаныма көзім жетеді. Басында жұбайым ренжіп, өкпе-назын білдіретін-тұғын. Бірақ қазір түсінік танытып, әрдайым қолдау білдіреді, — дейді сақшы.
Екінің бірі учаскелік инспектор бола алмайды. Көбісі жұмыстың ауыртпашылығына шыдамай, басқа жаққа ауысып жатады. Кейіпкеріміздің сөзінше, инспектор болу үшін әуел кезекке шыдамдылық пен табандылық қажет. Одан кейін халықпен сөйлесе біліп, әртүрлі жағдайларда дұрыс шешім қабылдай алу керек.
-Жас полицейлерге әркез тәжірибеммен бөлісіп, бағыт-бағдар сілтеймін. Қандай да бір қиындықтарға тап болып жатса ақылымызды айтамыз. Осы ретте, Президентіміз Қасым-Жомарт Кемелұлының бізге көңіл бөліп, қолдау көрсетіп жатқаны қуантады. Бір тілегіміз – учаскелік инспекторлардың штаты арттырылса. Себебі қазір жер-жерде халық саны көбейіп, инспекторлардың жүктемесі ауырлай түсуде, — дейді Дулат Советқанұлы.
Сағат 21:00 шамасында жұмыс күні аяқталды. Бұл қатып қалған уақыт емес. Учаскелік инспекторлар кейде одан да жай қалып жатады. Тіпті таңға дейін тер төгетін сәттер де кездеседі. Дулат Абдрахмановпен сұхбатымзда , оның жұмыстағы төзімділігі мен еңбекқорлығына қайран қалдық. Әңгімелесе жүріп инспектордың азаматтық ұстанымына беріктігі, қызметіне деген адалдығын сездік. Сездік те осындай сақшылар барда халықтың қауіпсіздігіне алаңдамауға болатынын түйсіндік.
– Қызметтің ауыртпалығына қарамастан, учаскелік полиция инспекторы болып жұмыс істеу мен үшін құрмет, – деп атап өтті Дулат Абдрахманов.