Облыс әкімі Нұрлан Ұранхаев «Ақшың» сауда үйіндегі өрттен зардап шеккен кәсіпкерлердің бастамашыл топ өкілдерімен кездесті.
Жадыра ТӨЛЕГЕНҚЫЗЫ,
«Semeı tańy»
Жиынға сондай-ақ Семей қаласы әкімдігінің, Төтенше жағдайлар департаментінің, Абай облысы әкімі аппаратының өкілдері, облыс әкімдігінің басқарма басшылары, «Атамекен» ҰКП-ның және БАҚ өкілдері қатысты. Кездесу барысында қажетті құжаттарды жинау, субсидия, жалға алу және әлеуметтік қорғау мәселелері талқыланды.
Бүгінгі күнге дейін кәсіпкерлерден полиция бөліміне 296 өтініш түскен.
— Мемлекет тарапынан барлық қажетті көмек көрсетіледі. Бұл процеске барлық құзырлы орган жұмылдырылған,- деді кездесу барысында Нұрлан Ұранхаев.
Зардап шеккендерге облыс әкімдігі қажетті мемлекеттік қолдау көрсетуде. Мәселен, 35 жасқа дейінгі кәсіпкерлер үшін 2,5 пайызбен 5 миллион теңгеге дейін жеңілдетілген несие беру қарастырылған. Екінші деңгейлі банктерге өрт салдарынан зардап шеккендердің несиесін төлеуді 3 айдан 6 айға дейін кейінге қалдыру туралы хаттар жолданып, кәсіпкерлерге өз өнімдерін өткізу үшін жаңа сауда орындары ұсынылған. Жергілікті университеттер зардап шеккендердің отбасыларына 6 айға дейін оқу ақысына жеңілдіктер жасайды.
Сондай-ақ жұмыссыз қалғандарды жұмысқа орналастыруға көмектесетін штаб ашылды. Штаб Абай атындағы облыстық әмбебап кітапханада орналасқан.
Облыс әкімі Нұрлан Ұранхаев сондай-ақ кәсіпкерлерді жеке мәселелері бойынша қабылдады. Қабылдауда зейнеткерлік жасқа толған кәсіпкерлерге баса назар аударылып, жұмыспен қамту және әлеуметтік қорғау мәселелері қарастырылды.
Зейнет жасына жақындаған кәсіпкерлерге жұмысқа орналасуға мүмкіндік беретін «Күміс жас» бағдарламасына қатысу ұсынылды. Басқа ұсыныстар да қарастырылды. Әрбір кәсіпкерге қолдау көрсету үшін алдағы уақытта атқарылатын нақты жұмыс алгоритмі ұсынылды.
Семей қаласында биылғы жылдың үшінші тоқсанында коммуналдық азық-түлік сауда орнын ашу жоспарланып отыр. Онда бизнес өкілдері үшін де жаңа жұмыс орындары құрылмақ.
Сауда үйіндегі өрттен кейінгі жағдай Абай облысы әкімінің жеке бақылауында тұр.
