Соңғы күндері «кәрі құда» қаһарына мініп, әлек салуда. Боран соғып, қалың қар жауып, аяз күшейе түсті. Абай облысының төтенше жағдайлар департаменті мамандары мен тәртіп сақшылары, жол полициясы өкілдері алдын ала ескертілгеніне қарамастан жолға шығып кетіп, қар құрсауында қалған жолаушыларды құтқаруда. Мұндай жағдайлар біздің өңірде ғана емес, еліміз бойынша сипат алуда.
Әлібек КЕМЕЛХАН,
«Semei tany»
Бірнеше күннен бері боран соғып, аяз күшеюіне байланысты облыстық, республикалық маңызы бар автомобиль жолдары тәуліктің түнгі мезгілінде уақытша жабылып, көлік қозғалысына шектеу қойылды.
Әсіресе Көкпекті, Жарма, Аягөз аудандары бойынша жағдай күрделі. Мәселен, Көкпекті ауданында ауа райының қолайсыздығына байланысты аудан әкімі Ділдәбек Оразбаевтың шешімімен жергілікті ауқымдағы табиғи сипаттағы төтенше жағдай режимі енгізілді.
«Көкпекті аудандық төтенше жағдайлардың алдын алу және оларды жою жөніндегі аудандық комиссия отырысының 16 ақпандағы №2 хаттамасы негізінде Көкпекті ауданының аумағында жергілікті ауқымдағы табиғи сипаттағы төтенше жағдай жариялансын», — делінген хабарламада.
Табиғи сипаттағы төтенше жағдайды жою жөніндегі штабтың басшысы болып Көкпекті ауданы әкімінің орынбасары Марат Теміржанов тағайындалды.
Демалыс күндері Көкпекті ауданында ауа райының қолайсыздығына байланысты 126 көлік, оның ішінде 90 жеңіл, 35 жүк және 1 автобус қар құрсауында қалған. Сынап бағанасы кейбір жерлерде -35-38 градусқа дейін төмендеді. Осыған байланысты, аудан басшысы Дәлдәбек Тәжібайұлының тікелей ұйымдастыруымен ауданның барлық коммуналдық қызмет мамандары және жеке кәсіпкерлердің техникалары республикалық маңызы бар автомобиль жолындағы жолаушыларды құтқару, жолды тазалау жұмыстарына жұмылдырылды.
Жолаушыларға Көкпекті орта мектебінде ыстық тамақ пен жатын орындар дайындалды. Қазіргі таңда жағдай аудан әкімінің бақылауында.
Сонымен қатар өткен тәулікте Көкпекті ауданындағы әйгілі Байбура асуындағы жағдайға байланысты арнайы мониторинг жасалды.
Қар құрсауында қалған автомобильдерді жылыту үшін жылу генераторларын жеткізу мақсатында Абай облысы әкімінің орынбасары Димитрий Гариков пен ТЖД бастығы Манарбек Шапағатов Қорғаныс министрлігінің МИ-17 тікұшағымен шықты.
Бүгінгі таңда, соңғы мәліметтер бойынша, облыстың автомобиль жолдарында автокөлік кептелісі жоқ. Қазіргі уақытта аяз салдарынан қатып қалған автомобильдерді жылыту және оларды елді мекендерге тасымалдау жұмыстары жүргізілуде.
Соңғы мәліметтер бойынша, 27 жеңіл және 7 жүк көлігі өз бағытымен кетті. Бұл учаскеде 78 адам және 30 техника жұмыс жүргізді. Жол бойындағы ақ түтек қарлы бораннан құтқарылған адамдар жергілікті атқарушы органдардың көмегімен тұрғылықты жерлеріне қайтарылып жатыр.
Жағдай Аягөз ауданында да біршама күрделі. Қар шығару жұмыстарына Аягөз гарнизонының әскери бөлімдері көмекке келді. Олар облыстық маңызы бар жолдарды арнайы әскери техниканың күшімен ашуда. Нәтижесінде қар құрсауында қалған 90-нан аса жолаушы Аягөз қаласына жеткізілді. Коммуналдық мекемелерге орналастырылып, ыстық тамақ берілді.
Бүгінгі күні қала көшелерін басып тастаған қарды шығару жұмыстары жалғасуда. Коммуналдық қызмет жұмысшыларына жергілікті ерікті жастар, теміржолшылар көмектесуде.
Айта кетерлігі, демалыс күндері Аягөз қаласындағы «Новая» жылу қазандығынан ақау шығып, нәтижесінде көп қабатты үйлердің жылу жүйесіндегі судың қысымы біршама төмендеп кетті. Алайда аудан әкімі Қанат Әділбаевтың басшылығымен жедел іске кіріскен коммуналдық қызмет мамандары жылу трассасының жұмысын толықтай қалпына келтірді. Бүгінде қазандық қалыпты жұмыс істеп тұр.
Синоптиктердің болжамына сүйенсек, осы аптада ел шығысында сынап бағанасы кейбір жерлерде — 40 градустан да төмен белгіні көрсетпек. Сондай-ақ таулы аудандарда қалың қар мен бұрқасын күтілуде. Ауа райы тек алдағы демалыс күндері ғана тұрақталады деп болжануда.
