Биыл Семейде 13 көп пәтерлі тұрғын үйдің құрылысы басталмақ. Сонымен қатар тағы бір көп функционалды кешен пайда болмақ. Кешен «Локомотив» стадионының аумағында салынады деп жоспарланып отыр. Бұл туралы Абай облысының өңірлік коммуникациялар қызметінде өткен баспасөз конференциясында айтылды.
Сымбат ҚАЙРАТҚЫЗЫ,
«Semeı tańy»
Сондай-ақ, Семей қаласының құрылыс бөлімінің басшысы Руслан Сақтағанов айтып өткендей, тұрғын үй секторында да құрылыс қарқынын белсенді дамыту жалғасуда.
— 2023 жылы 21 көп пәтерлі тұрғын үйдің құрылысы басталды, жобалар ауыспалы болғандықтан, құрылыс әлі де жалғасуда. Салынып жатқан үйлерді 3-тоқсанда пайдалануға беру жоспарланған. 21 үйде 1 352 пәтер болады деп есептелінген. Барлық пәтерлердің жалпы ауданы 82 мың шаршы метр, — деді Руслан Сақтағанов.
Бөлім басшысы сондай-ақ облыс орталығында мектептер де салынып жатқанын жеткізді.
— Үстіміздегі жылдың 2-тоқсанында 712 пәтерге арналған 13 көп пәтерлі тұрғын үй құрылысын бастау жоспарлануда. Құрылыс, негізінен, Қарағайлы шағын ауданында жүргізіледі. Сонымен қатар 1 300 орындық мектептің құрылысы басталды. Водный кентінде тағы бір мектеп салынуда, бұған қоса, биыл Ақсай, Шығыс кенттерінде және Қарағайлы шағын ауданында тағы үш білім беру мекемесінің құрылысы басталады. 2023 жылы Семей қаласының әкімдігі мен «Қазминералс-Демеу» корпоративтік қоры арасындағы келісім бойынша, Заря шағын ауданында 1200 орындық мектептің құрылысы басталғаны белгілі, — деді Руслан Сақтағанов.
