Абай облысы мәслихатының кезектен тыс, он үшінші сессиясы өтті. Сессия жұмысына Абай облысы әкімінің бірінші орынбасары Шалқар Байбеков, мемлекеттік мекемелердің басшылары мен бұқаралық ақпарат құралдарының өкілдері қатысты.
Жадыра ТӨЛЕГЕНҚЫЗЫ,
«Semeı tańy»
Сессия отырысында сегіз мәселе қаралды. Күн тәртібіндегі мәселелер бойынша Абай облысы әкімі аппаратының басшысы Жасұлан Сәрсебаев, ауыл шаруашалығы және жер қатынастары басқармасының басшысы Анзор Абаев баяндама жасады.
«Абай облысы мәслихатының 2023 жылғы 27 желтоқсандағы «Абай облысының басқару схемасын бекіту туралы» шешіміне өзгерістер енгізіліп, «Абай облысының цифрлық технологиялар басқармасы» ММ және «Абай облысының жұмылдыру дайындығы және азаматтық қорғау басқармасы» ММ құрылды, сондай-ақ Абай облысы әкімдігінің дербес құрамы бірауыздан бекітілді.
2024 жылға жергілікті атқарушы және өкілді органдардың қызметкерлеріне тұрғын үйді жалға алу бойынша шығыстарды өтеуге арналған төлемдерді қамтамасыз ету туралы Абай облысы әкімі аппаратының басшысы Жасұлан Сәрсебаев баяндап өтті.
Сессияда Аягөз ауданының әкімшілік-аумақтық құрылысына өзгерістер енгізу мәселесі де қаралды. Ортаарал мен Ақшоқы ауылдары таратылып, оның аумағы Тарбағатай ауылдық округінің Тарбағатай ауылының әкімшілік құрамына, Ай ауылы таратылып, оның аумағы Нарын ауылдық округінің Шынқожа ауылының әкімшілік құрамына енгізілді.
— Абай облысы Аягөз ауданы Тарбағатай ауылдық округіне қарасты Ортаарал елді мекенінің жалпы жер көлемі – 48 мың гектар. Онад 39 адам тұрып жатыр. Ортаарал ауылы Тарбағатай ауылдық округінің орталығы Тарбағатай ауылынан 18 шақырым қашықтықта орналасқан. Елді мекен халқы мал шаруашылығымен айналысады. Мектеп жасындағы балалар жоқ. Ауылдағы бастауыш мектеп бала санының аздығына байланысты жабылған. Ауылда өндірістік орындар, қоғамдық, тұрмыстық қызмет көрсету нысандары, мектеп және медициналық пункт жоқ. Ауыз су бұлақтардан алынады. Елді мекенді дамыту экономикалық жағынан тиімсіз. Ауыл жабылғаннан кейін елді мекен қыстақ болып қалады. Ақшоқы, Ай елді мекендеріндегі жағдай да осындай,- деді Ж.Сәрсебаев.
Абай облысының ауыл шаруашылығы және жер қатынастары басқармасы басшысы Анзор Абаев Бесқарағай ауданының әкімшілік-аумақтық құрылысына енгізілетін өзгерістер туралы баяндады. Атап айтқанда, Глуховка және Канонерка ауылдық округтерінің шекаралары өзгертілді. Жалпы ауданы 1899,3 гектар Глуховка ауылдық округінің Жыланды ауылы Канонерка ауылдық округіне берілді. Осылайша, Глуховка ауылдық округінің шекарасының жалпы ауданы 113 125,7 гектар, Канонерка ауылдық округінің шекарасының жалпы ауданы 76 800,7 гектар болып бекітілді.
Сондай-ақ Семей қаласындағы бағалау аймақтарының шекаралары және жер учаскелері үшін төлемақының базалық ставкаларына түзету коэффициенттерін бекіту; Абай облысы мәслихатының 2022 жылғы 5 қазандағы «Абай облысы бойынша ауыл шаруашылығы жануарларын жаю қағидаларын бекіту туралы», 2023 жылғы 20 сәуірдегі «Абай облысының халқын орталықтандырылмаған ауыз сумен жабдықтау кезінде жер үсті және жер асты су объектілерінен су алу ережесін бекіту туралы» шешімдеріне өзгерістер енгізу туралы сұрақтар да қаралды.
Сессияның негізгі бөлігі аяқталған соң бірқатар депутаттар облыс әкімі Нұрлан Ұранхаевқа сауалдарын жолдады. Халық қалаулысы Ержан Қойгелдин Көкпекті ауданы Преображенка ауылындағы орта мектептің жағдайын айтып, Преображенка орта мектебінің жобалық-сметалық құжаттарын әзірлеуге қаржы бөлуге көмек көрсетуін сұрады. Сондай-ақ Преображенка ауылының дәрігерлік амбулаториясын күрделі жөндеуден өткізу мәселесі 2023 жылдан қолға алыныпты. Қазіргі уақытта жобалық-сметалық құжаттар дайын. Күрделі жөндеу 87 млн 300 мың теңгені қажет етеді екен. Депутат 2024 жылы жұмыстарды жүргізу үшін қаражат қарастыруды сұрады.
«Республика» партиясы атынан сайланған облыстық мәслихат депутаты Арман Ахметқанов үй жануарларының қатысуымен болатын жол-көлік оқиғалары көбейіп бара жатқанына алаңдаушылық білдіріп, жол бойына қоршаулар орнату қажет екенін айтты.
2023 жылы ашылған мүмкіндігі шектеулі балаларға арналған «QAMQOR SEMEY» ЖШС-ға қатысты мәселе бойынша Шолпан Шегедекова да депутаттық сауалын жолдады.
Талғат Баймуринов жаңадан құрылған Жаңа Семей ауданының тез қалыптасып, жұмыс істеп кетуі үшін жер қатынастары, ауыл шаруашылығы бөлімдеріне Семей қаласы әкімдігінің тиісті бөлімдерінің мамандарын жұмылдыруды сұраса, Марат Құрманбай әріптестерінен 6 ақпан күні «Ақшың» сауда үйінде орын алған өртке байланысты тексеру комиссиясының әділ шешім шығаруына атсалысуларын өтінді.
Жиын соңында облыс әкімінің бірінші орынбасары Шалқар Байбеков күн тәртібінде қарастырылған мәселелердің шешімі алдағы уақытта тиімді жұмыс атқаруға мүмкіндік беретінін атап өтіп, депутататрдың сауалдары тиісті мекемелерге жолданатынын айтты.
