Сейсенбі күні Семей қаласының әкімі Нұрбол Нұрсағатов кезекті мәрте қала тұрғындарын жеке сұрақтары бойынша қабылдады.
Қала басшысының қабылдауында 28 адамның өтініші қаралды. Олардың қатарында Бобровка, Мұрат, Шығыс саяжайы алаптарының тұрғындары және үй кезегі, жер алу мәселесімен келген азаматтар да бар.
Қабылдауға жазылған азаматтардың арыз-шағымдарын, өтініштері мен ұсыныстарын тыңдаған қала басшысы Нұрбол Нұрсағатов мәселелердің өзектілігін анықтай келе сала бойынша нақты жауаптар берді.
Саяжай алаптарының тұрғындарына заң аясында түсініктер берілді. Сәулет және қала құрылысы бөлімінің басшысы Дархан Сейтханов Бас жоспардың жобасы әлі де талқыланып жатқанын, әрбір қала тұрғынының пікірі ескерілетінін жеткізді.
Қабылдау барысында хаттамаға енгізілген мәселелердің бірқатары жедел шешімін тапса, өзге мәселелердің шешу жолдары түсіндірілді.
Семей қаласы әкімдігінің баспасөз қызметі
