Өткен аптада Абай облысына жұмыс сапарымен ҚР Мәжілісі депутаты Нұртай Сабильянов келіп, су тасқыны орын алған Аягөз, Жарма, Көкпекті аудандарында болды.
Мәжіліс депутаты алдымен Аягөз ауданына ат басын тіреп, Бозай ауылында халықпен кездесу өткізді. Бұл ауылда көпірді тасқын су шайып кеткендіктен, тұрғындар аудан орталығы мен басқа елді мекендерге бара алмай отыр. Қатынас құралы — аудандағы жалғыз қайық қана.
Ауыл тұрғындары Нұртай Салихұлына су батқан мал басының шығындарын өтеу, көпірді қалпына келтіру, ауылда спортзал салу, жеңілдетілген несие беру және жайылым мәселелерін көтерді.
— Мемлекет басшысы Қасым-Жомарт Тоқаев бүгінгі Үндеуінде Үкіметке тасқын судан зардап шеккен тұрғындарға көмектесу үшін мемлекеттік материалдық резервті пайдалануды тапсырды. Үкімет шығындарды өтеудің тиімді жолдарын шұғыл қарастырады. Берілетін өтемақы шығынды толық жабуы қажет. Мемлекет басшысы атап өткендей, қызыл судан зардап шеккен азаматтардың ешқайсысы ескерусіз қалдырмайды. Баршаңызға қаржылық және басқа да көмек беріледі. Материалдық шығындар толық өтеледі,- деді Н.Салихұлы.
Мәжіліс депутаты осыдан соң Жарма ауданына келді. Үшбиік ауылының ортасындағы екі ауылды байланыстыратын су шайған ескі көпір қазір апаттық жағдайда тұр. Өткел қауіпті болғандықтан, көліктер айналма жол арқылы жүріп жатыр.Тұрғындар осы көпірді жаңадан салу қажеттілігін айтты.
Қазіргі таңда елді мекенде жағдай қалыпты. Аудан әкімдігі тарапынан көпірді жөндеу бойынша жобалық-сметалық құжаттама дайындалып, тиісті құжаттар облысқа ұсынылған. Депутат атқарылып жатқан жұмыстарға оң баға берді.
Сапар барысында Н.Сабильянов Жаңғызтөбе кентінің жанындағы көпірдің жағдайымен танысты. Бүгінде көпір қалпына келтіріліп, көлік қозғалысы жанданған.
Мәжіліс депутаты Көкпекті ауданына да барды. Уақтылы қабылданған шаралар мен атқарылған жұмыстардың арқасында Көкжайық ауылына қауіп төндірген судың беті кері қайтқан. Бүгінде өңірді су басу қаупі жоқ, жағдай тұрақты. Тұрғындар халық қалаулысына Көкжайық ауылының жанынан тасқын суға қарсы бөгет салу қажет екенін айтты.
Сондай-ақ Тассай ауылына баратын жолдағы көпірді су шайып кеткен. Қарым-қатынас қайықтар арқылы жүзеге асырылуда. Сондықтан жаңа көпір салу мәселесі күн тәртібінде тұр.
— Жалпы, өңірлердегі төтенше жағдайлар департаменттерінің материалдық-техникалық базасын жақсартып, оларды кадрлармен толық қамтамасыз ету қажет. Су тасқынынан зардап шеккен әр азаматтың мәселесі, елді мекендегі жағдайлар тиянақты қарастырылып, барлық мәселелер шешілетін болады. Осындай қиын-қыстау кезде ауызбіршілігімізді көрсетіп, су тасқынынан зардап шеккен азаматтарға барлық қолдау көрсетуіміз қажет,- деп түйіндеді сөзін Н.Сабильянов.
