Облыс әкімі Нұрлан Ұранхаев Семейдегі ірі кәсіпорындар мен өнідіріс орындарын аралап, олардың бүгінгі жай-күйімен, алдағы даму жоспарларымен танысты.
Облыс әкімі Нұрлан Ұранхаев, Семей қаласының әкімі Нұрбол Нұрсағатов, Абай облысы әкімі аппаратының басшысы Жасұлан Сәрсебаев, кәсіпкерлік және индустриялық-инновациялық даму басқармасының басшысы Рүстем Ворошилов бастаған топ алдымен аймақтағы жетекші кәсіпорындардың бірі «Daewoo BUS KAZAKHSTAN» ЖШС-ге барды.
Нарықта өз жұмысын 2007 жылы бастаған зауыт бүгінде жақсы көрсеткіштерге қол жеткізіп жүр. Алайда алдағы жобаларды табысты іске асыру үшін оларға қолайлы жағдай мен қолдау қажет. Мысалы, «Daewoo BUS KAZAKHSTAN» ЖШС-нің тұрақты тұтынушылары — автобус парктері өнімдерді «Өнеркәсіпті дамыту қоры» АҚ арқылы лизингпен сатып алады екен. Сондықтан компания өкілдері қаржыландыру мен сату көлемін арттыру үшін Қорға қосымша қаражат бөлуге жәрдем көрсетуді сұрады.
Бүгінгі таңда «СемАз» ЖШС зауыты аз тонналды «HINO» маркалы автомобильдерін, «BELARUS» маркалы тракторларын, «SHACMAN» және «DONGFENG» жүк автомобильдерін, «ZHONGTONG» және «DONGFENG» қалалық үлгідегі автобустарын, жол талғамайтын және арнайы мақсаттағы «Урал» маркалы автомобильдерін шығарады.
Екі ауысымдық жұмыс режимінде зауыт 3500 бірлік «Беларусь» тракторларын, 10 000 бірлік жүк автомобильдерін, 1200 бірлік автобустар шығарады.
Облыс әкімі осыдан соң «Семей машина жасау зауыты» АҚ-ға барды. Кәсіпорын
Ресейдегі Рубцовск машина жасау зауытының дербес бөлімшесі ретінде 1969 жылдан жұмыс істеп тұрған кәсіпорынның негізінде 1988 жылдың қаңтарында құрылған. 2003 жылдың наурыз айынан “Қазақстан инжиниринг” ҰАҚ-ның құрамында енген. Компания бүгніде жүк вагондары, жылжымалы құрамның жиынтықтары, тіркеме техникасы сияқты өнімдерді өндіреді. Облыс әкімі кәсіпорын жұмысымен, алдағы жоспарларымен танысты.
Семейде қаптама материалдарын шығаратын ірі кәсіпорын «Қазполиграф» жауапкершілігі шектеулі серіктестігі елімізде ғана емес, Орталық Азия мен Ресей нарығында сапалы өнімдерімен танылған. Комбинат жылдан жылға өрісін кеңейтіп, қызметін одан әрі жетілдіріп келеді. Мұнда қазір түрі мен түсі сан алуан қаптамалар озық технологиялармен шығарылып жатыр. Компания алдағы уақытта пюр пак және тетра пак типті қаптамаларды өндіруді кеңейтуді жоспарлап отыр.
Облыс әкімі кәсіпорын жұмысына жоғары баға берді.
