10 сәуір күні Абай өңірлік коммуникациялар қызметінде «Шығыс Жастары» қоғамдық қоырның атқарушы директоры Әліби Абдураимовтың қатысуымен баспасөз мәслихаты өтті.
2018 жылы құрылған қоғамдық қор үкіметтік емес ұйым ретінде белсенді жұмыс істеп, мемлекеттік жастар саясатын дамытуға қомақты үлес қосып келеді.
Баспасөз мәслихаты барысында «Шығыс Жастары» қоғамдық қорының директоры жастар саясатын жүзеге асыру бағытындағы алдағы жоспарларымен бөлісті.
— Биыл мемлекеттік тапсырыс аясында бірқатар жобаларды іске асыруды жоспарлап отырмыз. Оның алғашқысы — «Ауыл жастарының әлеуетін арттыру» мемлекеттік әлеуметтік тапсырысы шеңберіндегі «240 сағат ауылда» жобасы. Бұл жоба 2019 жылы пилоттық жоба ретінде Жаңасемей ауданының Көкентау ауылында сәтті жүзеге асқан болатын,- дейді қор директоры.
— Не себепті 240 сағат? Бұл дегеніміз 10 тәулік, яғни 10 күн. Қалада туып, қалада өскен, қалада оқыған, ауылдың иісі мұрнына бармайтын жастарды ауылға апарып, он күн бойы оларға арнайы тапсырмалар береміз. Алғашқы күні қалалықтар ауыл өмірімен танысса, келесі күні екі қолға бір күрек тауып береміз. Жігіттер қой бағып, қой сойып, су тасып, боқ шығарса, қыз балалар үй жинап, от жағып, тамақ пісіріп, сиыр сауып біздің тапсырмаларымызды орындайды. Соңғы күндері қатысушы жастар өздерінің қабілеттерімен бөліседі. Мысалы, ауыл жастарына би билеуді, жоба жасауды, технологияны меңгеруді және басқа да қажетті дүниелерді үйретеді. Осы арқылы біз жастардың бос уақытын тиімді пайдалануларына көмектесеміз. Екіншіден, қала мен ауыл жастары арасына байланыс орнатамыз.
Қоғамдық қор әлеуметтік тапсырыс аясында сондай-ақ облысымызға қарасты барлық ауылдық елді-мекендерге барып, Отбасы банк, «Атамекен» кәсіпкерлер палатасы, «Даму», кәсіпкерлікті қолдау қоры, Агрокредит корпорациясы, Мансап орталығы және басқа да мекемелердің өкілдерімен бірге жастарға әртүрлі сала бойынша кеңес беруді ұйымдастырмақ.
— «Жастардың волонтерлік бастамаларын қолдау» әлеуметтік жобасы аясында Абай облысы волонтерлерінің бірыңғай электрондық базасын қалыптастырмақпыз. Сол арқылы біз волонтерлер қозғалысын тиімді ұйымдастыра аламыз. Шұғыл хабарлау және волонтерлерді жинау үшін ұялы оператор арқылы автоматты SMS-тарату мүмкіндігін қамтамасыз ететін боламыз. Білім, Саулық, Сабақтастық, Таза Әлем, Асыл мұра, Қамқор, Үміт, Аяла волонтерлік бағыттары бойынша еріктілердің бірыңғай тізілімін жүргіземіз.
Абай облысының барлық қалалары мен аудандарында кемінде 1500 волонтердің қатысуымен ағаш отырғызу бойынша акциялар ұйымдастырылады. Облыс волонтерлері туралы материалдарды әлеуметтік желілерде таргеттеуді, сондай-ақ Google.kz сайтында сұрау салу кезінде жоба туралы жаңалықтардың ТОП-10-ға кіруін қамтамасыз етуді көздеп отырмыз. «Алғашқы медициналық көмек көрсету», «Төтенше жағдайлар туындаған кезде қорғану тәсілдері және іс-қимылдар», «Әртүрлі жағдайлардағы қауіпсіз мінез-құлық қағидалары» тақырыптары бойынша кемінде 20 оқыту іс-шараларын өткізіп, бірқатар волонтерлерге арналған байқаулар мен акциялар ұйымдастырамыз,- деді Әліби Абдураимов.
«Шығыс Жастары» ҚҚ тарапына қолға алынған тағы бір маңызды
жобалардың бірі – облыстағы үкіметтік емес ұйымдар мен азаматтық қоғам институттарының жұмысын үйлестіретін Азаматтық ресурстық орталық ашу. Бұл орталықта ҮЕҰ өкілдері бас қосып, тәжірибелерімен бөлісіп, пікір алмасып, ұсыныстарын білдіріп, ортақ жобаларды жүзеге асыру үшін бас қосатын болады.
— Өздеріңіз білесіздер, Абай облысында үкіметтік емес ұйымдар көптеп тіркелген. Оларды бір ортаға шоғырландыратын арнайы орта қажет. Біз сол ортаны құруға дайынбыз. Мемлекеттік тапсырыс аясында осы үкіметтік емес ұйымдардың басын біріктіретін Азаматтық ресурстық орталық құрамыз. Бұл орталық олардың жұмысын жүйелендіруге айтарлық септігін тигізеді деп ойлаймын,- деді қор директоры.
Қоғамық қор сондай-ақ қала әкімі Нұрбол Нұрсағатовтың қолдауымен «Бизнес инкубатор» жобасын іске асыруды да қолға алған. Жобаның негізгі мақсаты — жаңа кәсіпорындарды қолдау, инновациялық идеяларды іске асыру және жаңа технологияларды дамытуға жағдай жасау, жаңа жұмыс орындарын құрып, экономикалық өсімге үлес қосу. Жуырда бұл жоба да іске қосылмақ.
Баспасөз мәслихаты барысында Әліби Абдураимов жобалар туралы БАҚ өкілдерінің қосымша сауалдарына жауап берді.
