Абай облысында республикалық «Таза Қазақстан» экологиялық акциясы жалғасуда. Өткен сенбіде облыс әкімі Нұрлан Ұранхаев пен қала әкімі Нұрбол Нұрсағатовтың қатысумен Семей орманының 6 гектар аумағына 28 560 түп көшет отырғызылды, сондай-ақ Шығыс кентінде тазалық жұмыстары жүргізілді.
Елімізде 6 сәуірден бастап Президент Қасым-Жомарт Кемелұлы Тоқаевтың бастамасымен «Таза Қазақстан» экологиялық акциясы басталды.
«Мен әкімдердің бәріне бұл бірреттік науқан емес екенін ескерттім. Басқаша айтқанда, сенбілікке шығып, жұмыс істеген сыңай танытып, көзбояушылық жасауға болмайды. Көршілес елдердегі секілді бізге де Қазақстанды көгалдандыру, өңірлер мен қалалардың аумақтарын тазарту жұмыстарын үнемі жүргізу керек,- деген еді Мемлекет басшысы Қасым-Жомарт Тоқаев су тасқынына қарсы іс-шараларды үйлестіру және су тасқыны салдарын жою жөніндегі республикалық штабтың отырысында сөйлеген сөзінде.
Аталған экологиялық акцияға облыс әкімі Нұрлан Ұранхаев, қала әкімі Нұрбол Нұрсғаатов, мемлекеттік және жеке меншік мекемелер қызметкерлері, қоғамдық ұйымдардың өкілдері, студенттер және оқушылар қатысып, жасыл желек отырғызып, қаламызды көгалдандыруға өз үлестерін қосты.
Облыс әкімі азаматтарды республика көлеміндегі ауқымды акцияға белсене атсалысып, өз үлестерін қосуға шақырды және «Бейбітшілік» аралығындағы бұрыңғы қалқымалы көпір аумағына барып, жағалаудағы бекіту жұмыстарымен де танысты. Қала әкіміне жағдайды бақылауда ұстап, аралды су басу қаупінің алдын алуды тапсырды.
Биыл жалпы облысымызда 65 000 түп көшет, Семейде қоғамдық орындарда жалпы ауданы 13 500 шаршы метр болатын қосымша гүлзарлар (4 500 шаршы метрге көпжылдық гүлдер, 9 000 шаршы метрге маусымдық гүлдер) отырғызылады.
Бұл күні сондай-ақ қала әкімі Нұрбол Нұрсағатов, мемлекеттік және жеке меншік мекемелер қызметкерлері, қоғамдық ұйымдардың өкілдері, студенттер Шығыс кентіне сенбілікке шығып, қыс бойы қар астында жатқан қоқыстарды тазалады.
— Бір күн алдын Шығыс кентін аралап шығып, қоқыс көп жатқан орынды таңдап алдық. Екі айлық экологиялық акция шеңберінде осындай ең лас орындарды тазалап жатырмыз. Аумақты кент тұрғындарының өздері қоқысқа толтырып жатқан сияқты. Себебі мұнда қалалықтар көп келе бермейді. Бәріміз таза жерде өмір сүргіміз келеді. Сондықтан азаматтардан тазалықты сақтауды, екі айлық акцияға өз үлестерін қосуды сұраймыз,- дейді Семей қалалық мәслихатының депутаты Қанат Шапатов.
Жалпы, бұл күні Семейде республикалық «Таза Қазақстан» акциясына 15 мыңға жуық адам қатысты. Акция әр апта сайын түрлі бағыттарда жалғаса бермек.
