Еліміздің тең жартысын тасқын су басып, қаншама елді дүрліктіріп, әбігерге салып жатқаны бәріміздің де қабырғамызды қайыстырды. Апатпен бетпе бет келіп, үй-күйінен, жиған-тергенінен айырылған қам көңіл отандастарымызға жанымыз ауырып, болып жатқан апатты жағдайдан төрт көзі түгел аман есен шығуына тілектес болып жатырмыз.Табиғаттың осындай тосын мінезінен әлемнің көп жерінде табиғи апаттардың жиілеп бара жатқанын да көріп отырмыз. Мемлекет басшысы Қазақстан халқына орын алған келеңсіз сәтке орай Үндеу жолдап, ауызбіршілікке шақырды.
«Тасқын судан зардап шеккен азаматтарға айтарым, мемлекет бірде-бір адамды ескерусіз қалдырмайды. Баршаңызға қаржылық және басқа да көмек беріледі. Материалдық шығындар толық өтеледі», – деп, ел президенті Қасым-Жомарт Тоқаев өте маңызды мәлімдеме жасады. Бұл да әр азаматтың қоғамдық санасына бір серпін беріп, халықтың жүрегіне сенім ұялатты. Су апатынан зардап шеккен халыққа, елдімекендерді қалпына келтіру жолында мемлекет тарапынан жасалатын қолдау мен көмектің өз деңгейінде болатынына басымдық беріп айтты.
Сонымен қатар, елім деген азаматтар, төтенше жағдай қызметкерлері, қарапайым халық, отандық бизнес өкілдері, қоғамдық ұйымдар мен мектеп, ЖОО-ның басшылары, ұжымдары және алғашқылардың бірі болып бас көтерген студент-жастардан құралған еріктілер алғы шепке шығып, өз туған елінің шын жанашырлары, нағыз патриоттары екенін танытып жатыр. Көрші мемлекет басшылары мен туысқан халықтар да алғашқы көмектерін жіберуде. Әл-Фараби атындағы Қазақ ұлттық университеті ұжымы да мемлекеттік деңгейдегі ұлы істің қолдаушысы болып табылуда.
Осы орайда Жоғары оқу орнына дейінгі білім беру факультеті, Шетеліктердің тілдік және жалпы білім беру дайындығы кафедрасының ұжымы да шын көңілдерімен су тасқынынан зардап шеккендерге көмек көрсету ретінде қаражат жинап, қажетті өнімдер мен заттарды, гуманитарлық жүктерді жедел жинап, университет басшылығы ұйымдастырған қабылдау пунктіне жеткізді. Еліміз осы күндері ауыр сынақты бастан өткеріп жатыр, расында ел басшысы айтқандай «Біздің күшіміз – бірлікте». Дәл осы сәтте бірлігіміз бен елдігімізді көрсететін уақыт келді. Біз зардап шеккен аймақ тұрғындарымен біргеміз және су тасқынының зардаптары тез арада жойылып, адамдар үйлеріне оралады деп сенеміз.
Әл Фараби атындаңы ҚазҰУ.
ЖОО-дейінгі білім беру факультеті
Шетелдіктердің тілдік және жалпы білім беру дайындығы
кафедрасының оқытушылары Р.И Дүйсенбаева, Г.Ә.Машимбаева
