Биыл Чернобыль оқиғасына – 38 жыл. Осыған орай 26 сәуір күні Достық үйінде Абай облысы ішкі саясат басқармасы басшысы Айдар Садырбаев Чернобыль ардагерлерімен кездесті.
Осыдан 38 жыл бұрын — 1986 жылы 26 сәуірде Украинаның Чернобыль қаласындағы атом электр станциясының төртінші блогі жарылып, Украинаның және Ресейдің Брянск пен Калуга облыстарының аумағы радиоактивтік ластануға ұшырап, үлкен экологиялық қатер орын алды.
— Кеңес Одағы тарихында қаралы күн болып қалған бұл оқиға көптеген адамның тағдырын өзгертіп, ұмытылмастай із қалдырды. Мәліметтерге сүйенсек, жарылыс салдарынан болған радиоактивті түтіннен оннан аса мемлекеттің жері ластанып, 10 миллионға тарта халық зардап шекті. Апатты залалсыздандыруға жүз мыңдаған сарбаз аттанып, Отан алдындағы борыштарын атқарды. Оның ішінде Қазақстан азаматтары да болды. Атом электр станциясы сепкен ажал уыты мыңдаған сарбаздың өмірін жалмады. Жарылыс салдары қоршаған ортаға, тұрғындар мен құтқарушылардың денсаулығына орасан зиян тигізді. Біз бүгінгі жас ұрпақ Сіздердің ерліктеріңіздің алдында бас иеміз. Сіздер нағыз жүрек жұтқан батырсыздар,- деді Айдар Садырбаев.
Чернобыль апатын залалсыздандыруға 1986-1992 жылдарда 600 мыңнан астам адам қатысқан екен. Олардың ішінде ресми тізімде 31 743 қазақстандық тіркелген.
Отырыс барысында сондай-ақ Чернобыль апатының ардагері, «Чернобыль» одағының республикалық қоғамдық бірлестігінің төрағасы Вениамин Следников, «Чернобыль мүгедектерінің ерікті қоғамы» қоғамдық бірлестігінің төрағасы Советқазы Қайсанов, «Чернобыль» апатының ардагері, Үйлестіру кеңесінің мүшесі Қуаныш Жанубеков сөз сөйлеп, өткен күндердің естелігімен бөлісті.
Отырыс соңында Чернобыль ардагерлері — Вениамин Следников, Советқазы Қайсанов, Қуаныш Жанубеков, Александр Гайдук, Дәулетқазы Балғабаев, Серікхан Төгісов, Сабырқан Жұртбаев, Амангелді Асылханов, Қали Бейсембинов, Бейсенғазы Тлеуов, Халел Тохтыхаджиев, Жұмағазы Рызуанов, Рысқали Мұхаметжанов алғыс хаттармен марапатталды.
