Апта басында Абай өңірлік коммуникациялар қызметінде «Abay it-Valley» технологиялық кластерінің негізін қалаушы Асхат Бейсембаевтың қатысуымен баспасөз мәжілісі өтті.
Баспасөз мәжілісі барысында Асхат Бейсембаев «Abay it-Valley» технологиялық кластерінің студенттері ойлап тапқан «Digital Elimai» мобильді қосымшасы туралы баяндады. Спикер атап өткендей, мобильді қосымша “Елімай” футбол клубының жанкүйерлері үшін әзірленген.
— Бүгін сіздерге «Abay it-Valley»-дің резиденттері әзірлеген мобильді қосымшаны таныстырмақпыз. Қосымша “Елімай” футбол клубының жанкүйерлері үшін арнайы әзірленген және QR-код арқылы жұмыс істейді. Қолданылуы өте қарапайым — Play Market-тен қосымшаны жүктеп, оған тіркелесіз және “Елімай” футбол клубының матчтарын көру үшін “Спартак” стадионына барасыз. Матч басталғанға дейін, үзілісте және соңғы ысқырықтан кейін таблода QR код көрсетіледі. Оны қосымшаның көмегімен сканерлеу керек. Осылайша, жанкүйерлер белгілі бір ұпайларға ие болады. Футбол матчтарынан қалмай келген жанкүйерлер маусымның соңында белгілі бір шекті ұпайды жинайды және «Елімай» футбол клубы әзірлеген жүлделер ұтысына қатыса алады, — деді Асхат Бейсембаев.
Асхат Бейсембаев қосымшаны әзірлеуге мемлекеттік бюджеттен немесе демеушілер есебінен қаражат жұмсалмағанын да атап өтті. Қосымшаны Alikhan Bokeikhan University студенттері тегін әзірлеген. Әзірлеушілер тобын «Abay it-Valley» технологиялық кластерінің резиденті Арыстан Қанафин басқарған.
— Мен Samsung Еducation Сampus-тің түлегімін. Жобадан алған білімді тәжірибеде қолдана алғаныма қуаныштымын. Бұл менің саладағы алғашқы тәжірибем. Қазақстанның спорт клубтарында мұндай қосымшаның тікелей аналогы әлі жоқ. Айта кетерлігі, мен бұл қосымшаны жалғыз әзірлеген жоқпын. Команда мүшесі Айдос Имантаев «Елімай» футбол клубының матчтары туралы мәліметтерді өзектендіруге көмектессе, Ілтипат Жорабек сөз тіркестерін орыс тілінен қазақ тіліне аударды. Ал мен кодтарды жазуға және қосымшаның дизайнына жауап бердім. 28 сәуір күні Елімай мен Ордабасы арасындағы футбол матчы кезінде қосымшаны тестілеуден өткіздік. 110 қолданушы тіркелді. Қателіктерді түзетіп, қосымшаны жаңарттық,- дейді Арыстан Қанафин.
Баспасөз мәжілісі барысында Арыстан Қанафин медициналық оқу орындарының студенттеріне арналған тағы бір қосымша әзірленіп жатқанын мәлімдеді.
— Бұл қосымша партограмма сияқты құжаттарды толтыруға көмектеседі. Партограмма — бұл ДДҰ ұсынған өте маңызды құжат және ол әйелдер толғатып ауруханаға түскен кезде толтырылады. Қосымша босанған әйелге сауатты медициналық көмек көрсетуге арналған. Бұл қосымшаны да біздің студенттер тегін әзірледі. Идея авторы – Семей медицина университетінің студенттері,- деді Асхат Бейсембаев.
Айта кетейік, «Abay it-Valley» технологиялық кластерінде 2022 жылдан осы күнге дейін 400-ден астам студент білім алды. 30-дан астам курс пен 70-тен астам іс-шара ұйымдастырылды.
Жадыра ТӨЛЕГЕНҚЫЗЫ, «Semeı tańy»
