Бейбітшілік аралында өткен жарысқа 100-ден астам жас бүлдіршін қатысты. Мерекелік шараның басты мақсаты салауатты өмір салтын ұстануға бағытталса, екінші параолимпиадалық балаларды қолдау үшін жасалған.
«Бүгін «Semey run kids» қайырымдылық марафонын ұйымдастырып жатырмыз. Негізі біздің Semeyrun club ұйымы 2020 жылдың 1 қаңтарында құрылған болатын. Қазіргі уақытта клубта 200-ден астам әуесқой жүгірушілер бар. Міне, сол ұйымның береке бірілігінің арқасында балаларға кішкене болсын көңіл-күй сыйлайық деп шараны арнайы ұйымдастырып отырмыз. Арнайы демеушілік жасаған қолдаушыларымызда бар. Біздің мақсат жан-жақты, күшті әрі жігерлі жастардың қатарын қалыптастыру», — деді Semeyrun club ұйымының мүшесі Айдар Турымбеков.
«Semey run kids» қайырымдылық жүгірісі 200, 500,1000 метр қашықтықта болды. Балалар үш санат бойынша жүгірді. Яғни 3-5 жас, 6-9 жас және 10-12 жас аралығындағы балалар. Әрбір учаскеде даулы мәселелерді болдырмау үшін видеофиксация мен тайминг-менеджерлер, еріктілер қызмет жасады.
Бейбітшілік аралындағы шара балалардың жүгіруімен ғана аяқталған жоқ. Бүлдіршіндер үшін мерекелік қойылым, ән, би және ойындар өткізілді. Сондай-ақ, «Semey run kids» қайырымдылық жүгірісі болғандықтан, тіркеу жарналарынан жиналған қаражат ерекше балалардың спорттық қызығушылығын қолдауға бөлінді. Яғни, әлеуметтік жобадан параолимпиадалық «Тең мүмкіндіктер әлемі» балаларына 300 мың теңгелік сертификат табысталды.
Марафон қорытындысы бойынша жеңімпаздар алғыс хат және бағалы сыйлықтармен марапатталды.
