Абай гарнизоны әскери қызметшілерінің балалары «Халықаралық балаларды қорғау күні» мерекесі қарсаңында жазғы лагерьге аттанды.
Бұл жолы әскерилердің 20-ға жуық баласы Балхаш қаласындағы «Балдәурен» республикалық оқу-сауықтыру орталығына тынығатын болады. Оларды мереке қарсаңында теміржол бекетінен «Шығыс» өңірлік қолбасшылығы әскерилері қолбасшысының орынбасары полковник Дархан Ажибаев пен ата-аналар шығарып салды.
Әскери қызметкерлердің отбасы мүшелерімен жұмысты ұйымдастыру қызметінің жетекшісі Ақмарал Ахметжанованың мәліметінше, оқу-сауықтыру орталығында әскери қызметшілердің балаларына сауықтыру және патриоттық тәрбие беру мақсатында ауқымды іс-шаралар ұйымдастырылмақ.
Бұл оқу-сауықтыру орталығына аттанған Абай гарнизоны әскери қызметшілер балаларының алғашқы легі емес, өткен айда тағы 40-қа жуық жасөспірім Қонаев қаласындағы лагерьде тынығып келген болатын.
Айта кетейік, балалардың жазғы демеласы еліміздің Қорғаныс және Білім министрліктерінің жастарға әскери-патриоттық тәрбие беруді жетілдіру жөніндегі бірлескен жоспары аясында жүзеге асырылуда. Ағымдағы жылы еліміз бойынша «Балдәурен» оқу-сауықтыру орталығы мен оның қалалардағы филиалдарына әскери қызметкерлердің балаларына арналған мыңнан астам квота бөлінді.
Абай өңірлік гарнизонының баспасөз қызметі
