Облыс әкімі Нұрлан Ұранхаев өткен апта соңында Бородулиха ауданына жұмыс сапарымен барды. Сапар аясында облыс әкімі Нұрлан Ұранхаев құрылыс жұмыстарының қарқынымен, ауылшаруашылығы саласының бүгінгі аяқалысымен танысты.
Петропавл ауылында Ақмола облысындағы Родина ауылының тәжірибесіне сүйене отырып майлы дақылдар өсіру жоспарлануда. Жобаны іске асырумен «Труд» ШҚ айналысады.
Бүгінде майлы дақылдар күнбағыс дәндері сияқты өнімдерді өндіру жоғары сұранысқа ие. Дәнді дақылдар ауыл шаруашылығында жануарлар мен құстарға азық ретінде пайдаланылатындықтан, осы салаларды дамыту маңызды. Биыл шаруа қожалықтары күнбағыс алқаптарын 2 500 гектарға дейін ұлғайтқан.
Аймақ басшысы сонымен қатар «Ауыл – ел бесігі» жобасы аясында жүзеге асырылып жатқан дене шынықтыру-сауықтыру кешені құрылысының барысымен, Мемлекет басшысының бұқаралық спорт пен дене шынықтыруды дамыту туралы тапсырмасы аясында жүзеге асырылып жатқан іс-шаралармен танысты. Дене шынықтыру-сауықтыру кешенінің мердігері — «СМУ Шығыс» ЖШС. Жұмыстарды 2024 жылдың тамыз айында аяқтау жоспарлануда.
Сапар барысында басқарма басшыларына, Бородулиха ауданының әкімі Айдар Ибраевқа, мердігер ұйымдарға нысандардың құрылысын белгіленген мерзімде аяқтау мен жұмыс қарқынын жеделдету тапсырылды.
Облыс әкімі Нұрлан Ұранхаев Бородулиха ауданының тұрғындарымен де кездесті.
— Өткен жылғы кездесулердің нәтижесінде көптеген өзекті мәселелер шешілді. Біз биылға және алдағы бес жылға арналған барлық жоспарды сәтті жүзеге асырудамыз. Басты мақсат – халықтың өмір сүру сапасын жақсарту. Облысымыздың даму бағытын айқындайтын Кешенді даму жоспарына сай жұмыстарды жалғастыра береміз, — деді Нұрлан Ұранхаев.
Бородулиха ауданы мыс, мырыш, алтын және күміс секілді минералды-шикізат ресурстарына бай. Өнеркәсіп секторын дамыту шеңберінде 2028 жылға дейін облыста 7 мың жұмыс орнын құру, 2 трлн теңге сомасына 22 жобаны іске асыру жоспарлануда.
Қазірдің өзінде 5 инвестициялық жоба іске асырылып, 1040 жұмыс орны ашылды. Жыл соңына дейін 17,2 млрд теңгеге тағы 7 жобаны іске қосу арқылы 385 жұмыс орнын құру көзделген.
— Бородулиха ауданы – облысымыздың маңызды ауыл шаруашылығы өңірлерінің бірі. Мұнда орман алқаптары бар. Өткен жылы бәріміз қиын кезеңді бастан өткеріп, табиғи апатқа қарсы күрестік. Ауданның барлық тұрғындарына белсенділігі мен азаматтық ұстанымы үшін шын жүректен алғысымды білдіргім келеді. Мемлекет басшысының бастамасымен «Таза Қазақстан» акциясы аясында қарағайлы орманына жас көшеттер отырғызып жатырмыз. Бұл бір реттік науқан емес, дәстүрге айналуы керек, — деді әкім.
Халықтың өмір сүру сапасын жақсартудың негізгі факторларының бірі – тұрғын үй-коммуналдық шаруашылығын және көлік инфрақұрылымын дамыту. Желілердің тозуын төмендету мақсатында 41,2 шақырым су құбыры желілері қайта жаңартылды, бұл желілердің тозу көрсеткішін 51 пайыздан 49,6 пайызға дейін төмендетуге мүмкіндік берді. 20 елді мекенде қайта жаңғырту жұмыстары жүргізілуде. «Ауыл – ел бесігі» бағдарламасы аясында 102 жоба іске асырылмақ. Оның ішіне Жаңа Шүлбі ауылында блок-модульді қазандықтың және 1,1 шақырым жылу желісінің құрылысы, сондай-ақ ауданның үш ауылында көше жарығын орнату жұмыстары кіреді.
Кездесу соңында азаматтарды жеке сұрақтары бойынша қабылдау өтті. Әкімнің жеке қабылдауында болған әр азаматқа толыққанды жауап беріліп, басқарма басшыларына тиісті тапсырмалар берілді.
Абай облысы әкімдігінің баспасөз қызметі
