Ауыл тұрғындарының кәсіпкерлік әлеуетін арттыру мақсатында Абай облысының кәсіпкерлерлік палатасы «Бір ауыл – бір өнім» жобасын жүзеге асыруда.
«Кәсіпкерлікті дамытудың 2021-2025 жылдарға арналған ұлттық жобасы» аясында қолға алынған жобаның басты ерекшелігі – өнім өндіруде жергілікті шикізатты пайдалану. Бұл жоба отандық өндірушілерге қолдау көрсетіп, халыққа пайдалы өнімдерді анықтауға мүмкіндік бермек.
— Біздің облыста жоба негізінен азық-түлік өнімдері, ұлттық өнімдер және биоөнімдерді шығару бойынша жүзеге асуда. Қатысуға өтінімдер қабылдау басталды. Жұмыс қорытындысы бойынша өндірушілер мен әлеуметі қатысушылардың тізімі жасалады. «Бір ауыл – бір өнім» жобасының жәрмеңке-көрмесі мен брендтік комитеттің таңдауынан кейін үш шағын кәсіпкерлік өкілі өз өнімдерін одан әрі дамытуға, гранттарға қатысуға және басқа да мемлекеттік қолдау шараларына қол жеткізе алады, — деді Абай облысы Кәсіпкерлер палатасының шағын кәсіпкерлікті дамыту бөлімінің басшысы Нұрасыл Мұратов.
Айта кетейік, жоба өткен жылы басталған. «Бір ауыл – бір өнім» жәрмеңке-көрмесіне былтыр 15 кәсіпкер қатысып, алты кәсіпкер мемлекет қолдауына ие болып, өз кәсіптерін тіркеген
— Жоба жеңімпаздарына өнімді дамыту және сату, тауар белгілері мен сапа стандарттарын әзірлеу бойынша қолдау көрсетілді. Осы бағдарламаға қосымша өткен жылы біз «Кәсіпке бағыт» жобасын сәтті жүзеге асырдық, нәтижесінде 44 қатысушының 19-ы монетизацияға, жаңа дағдылар мен кәсіпорынның өсуіне қол жеткізді. Жобаның жеті түлегі «Ауыл аманаты» бағдарламасы бойынша «Семей» АӨК-ден жалпы сомасы 43 300 000 теңгеге мал сатып алуға қаржы алды», — деді Нұрасыл Мұратов.
