Абай облысы 2024 жылғы Дүниежүзілік көшпенділер ойындарына (ДКО) қатысуға қызу дайындық үстінде. Ойындарға Абай облысынан 200-ден астам адам қатысады деп күтілуде. Дүниежүзілік көшпенділер ойындарына дайындық аясында облыста қазақша күрес, жекпе-жек, дәстүрлі садақ ату және тоғызқұмалақтан жарыстар өтті. Өңірлік коммуникациялар қызметінде өткен брифингте Абай облысының дене шынықтыру және спорт басқармасы басшысының орынбасары Бақыт Бекбосынов ауқымды шараға дайындық туралы айтып берді.
Алдағы ойындарға Абай облысынан бес спортшы қатысады деп күтілуде, олар қазақша күрес, алыптар жарысы, мас-рестлинг және басқа да дәстүрлі спорт түрлерінен сынға түседі.
— Спортшылар қызу дайындық үстінде және қазір Қырғызстандағы оқу-жаттығу жиындарында жүр. Алдағы ойындарға Құсбегілік спорт түрінен Ерзат Байқадамов пен мас-рестлингтен Дулат Барлықов қатысады. Олардың лицензиялары бар. Ал қазақша күреске қатысуға үміткерлер – Роза Нысантайқызы мен Ерсін Сейтқазинов, Дидар Тұқышов пен Зарина Сарипова (2022 жылы Түркияда өткен 4-ДКО жеңімпазы), сондай-ақ Әсет Ахметжанов пен Дәурен Нұралинов іріктеу нәтижесін күтуде, — деп нақтылады Бақыт Бекбосынов.
Қатысушылар физикалық дайындығы мен техникалық дағдыларын жетілдіру мақсатында белсенді түрде жаттығады. Ойындарда жоғары нәтижені қамтамасыз ету үшін стратегияға, төзімділікке және тактикаға назар аударылады.
— Дүниежүзілік көшпенділер ойындары – біздің спортшыларымыз үшін халықаралық аренада өз қабілеттерін көрсетуге тамаша мүмкіндік. Біз өз мәдениетіміз бен салт-дәстүрімізді жоғары деңгейде көрсете алатынымызды мақтан тұтамыз. Жаттықтырушылар мен мамандар әр спортшының барынша өзін көрсетіп, туған жерін лайықты таныта алуы үшін жұмыс жасауда», — деп толықтырды Абай облысының ұлттық және ат спорты түрлері бойынша спорт клубының директоры Болат Ақжігітов.
Ойындарға облыстан елшілер ретінде ауыр салмақ бойынша халықаралық дәрежедегі спорт шебері, Qazaq Kuresi бойынша Қазақстан чемпионы Айбек Нұғымаров, Qazaq Kuresi бойынша екі дүркін әлем чемпионы, Qazaqstan Barysy және Dala qyrandary турнирлерінің жеңімпазы Мұхит Тұрсынов және мемлекеттік жастар сыйлығының лауреаты Мерей Карт таңдалған.
