21 шілде күні Семейдегі Абай алаңында «Qazaq Marathon Abay» марафоны өтті. Оған еліміздің түкпір-түкпірінен және көрші мемлекеттерден келген 1000-нан астам желаяқ қатысты.
«Qazaq Marathon» — спорт сүйер қауым үшін еліміздің барлық өңірлерінде кезекпен ұйымдастырылып келеді. Осылайша, өткен сенбіде Семей қаласына да келіп жетті. Жарыс қатысушылардың физикалық мүмкіндіктеріне сәйкес, 21, 10, 5 және 2 шақырым (балаларға арналған) қашықтық бойынша өтті. Марафонға кәсіби спортшылармен қатар, әуесқойлар да қатысты. Олар еліміздің түкпір-түкпірінен және Ресей, Қырғызстан мемлекеттерінен де келді.
Жарыстың жалпы жүлде қоры 5,4 млн теңгені құрады.
Әр облыстағы марафонның сол өңірге сәйкес ерекшелігі болады. Абай облысында өткен марафонның ерекшелігі – тақия болды. Сондай-ақ футболкаларға Абайдың «Әуелде бір суық мұз ақыл зерек» өлеңінің шумақтары жазылды.
Алдымен әрбір қашықтықта жүгірушілер үшін сергіту жаттығулары ұйымдастырылып, содан кейін ғана жарыстар басталды.
— Мен осы марафонға қатысу үшін Астана қаласынан арнайы келдім. Астана қаласында өтетін марафондарға тұрақты қатысып отырамын. Өзім елордада мектеп мұғалімімін. Таңда ерте тұрып, жүгіремін. Салауатты өмір салтын ұстанамын. Әрдайым сергек болып жүру үшін спортты жұмыспен қатар алып жүремін. Бүгінгі марафонға қатысушылардың барлығына ризамын. Жалпы, Семей тарихи қала екен, маған ұнады. Өткен ғасырда салынған үйлер мен ғимараттарды көптеп кездестіруге болады. Сөзімнің соңында баршаларыңызды спортпен айналысуға шақырамын. Спорт адамға мықты энергия және көтеріңкі көңіл күй сыйлайды,- дейді марафон қатысушысы Меруерт Жәнібекқызы.
Ұйымдастырушылар жыл соңына дейін еліміздің басқа өңірлерінде осындай бес іс-шара ұйымдастыруды және әр жарысты өткізгеннен кейін сол қалада кәсіби жаттықтырушылар жұмыс істейтін жүгіру мектептерін ашуды жоспарлап отыр. Бұл мектептерде балалар тегін оқитын болады, уақыт өте келе ересектер де қамтылады.
– Мақсатымыз – халықты барынша спортқа тарту. Бұған дейін облыс спортшылары мұндай марафондарға қатысу үшін Алматы, Астана және Шымкент қалаларына келетін. Енді облыс тұрғындарын да қуантқымыз келді. Бүгінгі Семей қаласында өтке марафонға 1000-ға жуық адам қатысты. Барлық финишерлер бастапқы нөмірді, футболка мен тақияны сыйлық ретінде алды,- деді «Qazaq Marathon» жобасының авторы Азамат Ердесов.
Марафон соңында жеңімпаздар ақшалай сыйлықтармен марапатталды. Атап айтсақ, 21 шақырымдық абсолютті чемпиондар 300 мың, 250 мың және 200 мың теңге көлемінде ақшалай сыйақыға ие болды. Сондай-ақ әрбір қашықтықта жүгірушілердің жас санаттары бойынша жеңімпаздар жеке анықталып, олар 50 мың, 40 мың және 30 мың теңгеге ие болды.
Марафонға қатысушылар мен көрермендер көтеріңкі көңіл күймен тарасты.
Қазіргі уақытта «QAZAQ MARATHON TALDYQORGAN»-ға тіркеу ашылғанын айта кеткен жөн.
Жадыра ТӨЛЕГЕНҚЫЗЫ, «Semeı tańy»
