«500 кВ Солтүстік-Шығыс-Оңтүстік транзитінің құрылысы» жобасы екі кезеңде жүзеге асырылып, 2018 жылы аяқталады. Бұл жайында Семей қаласы бұқаралық ақпарат құралдарына баспасөз туры барысында «KEGOK» АҚ бас-қарма басшысы Бақытжан Қажиев мәлімдеді.
Жалпы құны жүз жиырма миллиард теңгені құрайтын жоба аясында қуаттылығы 500 кВ, ұзақтығы 1500 шақырым жоғары кернеулі электр желілерін және Семей, Ақтоғай, Талдықорған қалаларында қуаттылы 500 кВ үш шағын станса салу қарастырылған. Бұл мақсатты жүзеге асыруға компанияның жеке қаржысымен қатар, сырттан алынған қаражат та жұмсалмақ. Сонымен бірге желі құрылысы барысында екі мыңға жуық жаңа жұмыс орнын ашу жоспарланып отырған көрінеді.
— Елбасы жариялаған Жаңа Экономикалық Саясатқа сәйкес, «Нұрлы Жол» бағдарламасында «Екібастұз-Семей-Өскемен» және «Семей-Ақтөбе-Талдықорған-Алматы» бағыттары бойынша жоғары кернеулі электр желілерін салу туралы нақты мақсат қойылған. Бұл жобаның жүзеге асырылуы Қазақстанның біртұтас электр энергетикалық жүйесін мемлекетіміздің экономикасының қажеттіліктеріне сәйкес сенімді қолдану мен дамытуды қамтамасыз ету жөніндегі компанияның міндеттеріне сай келеді,-дейді «KEGOK» АҚ басқарма басшысы Бақытжан Қажиев.
{jcomments on}Бүгінгі таңда «Семей» шағын стансасының құрылысында белсенді жұмыс жүргізілуде. Мұнда арнайы порталдар салынған және қазіргі уақытта «Siemens» сияқты әлемдік өндірушілер шығарған замануи жаңа қондырғыларды орнату жүзеге асырылуда. Семей мен Өскемен қалаларының арасында желінің бойында үш жүзден астам бағана орнатылған, электр сымдарының монтажы жасалуда.
— Биыл шілде айының басынан бастап біз жұмыстарды атқара бастағанбыз. Күзде ауа райы жағдайына байланысты біраз қиындықтар туындаған еді. Алайда, күннің суытқанына қарамастан, жұмыс қайта жалғасып, жоспарланған кестеге сәйкес жүргізіліп жатыр. Бүгінгі таңда құрылыс-монтаж жұмыстарының басым бөлігі орындалды,- дейді Бақытжан Қажиев.
Жоғары кернеулі желінің құрылыс жұмыстарының барлығын отандық мердігер компаниялар атқаруда. Жоғары технологиялық құрылғылардан басқа, барлық қондырғылар мен шикізат жергілікті өндірушілерден алынуда. Олардың ішінде кабельдер, металл конструкциясы, темірбетон блоктары бар. Бас мердігер кәсіпорын — «Сәтті жол» ЖШС учаске басшысы Марат Отарбаев құрылыс нысандарында қажетті техника мен мамандар жұмыс істеп жатқанын айтты.
— Бүгінгі таңда біз учаскеміздегі жұмыстарды жүзеге асыруға көбіне осы өңірдің мамандарын тартудамыз. Бұл көрсеткіш сексен пайызға жуық. Құрылыс жұмыстарының қарқыны жақсы. Тек ауа температурасы 35 градустан төмендеп, желдің жылдамдығы секундына он метрге дейін жеткен кездерде ғана техникалық қауіпсіздіктің барлық ережелерін сақтау мақсатында жұмыстарды тоқтатуға мәжбүр боламыз,-дейді Марат Отарбаев.
Жоғары кернеулі желі пайдалануға берілген уақытта, Ұлттық электр желісінің Солтүстік-Шығыс, Солтүстік-Оңтүстік бағыттарындағы өткізгіштік мүмкіндігі артып, Оңтүстік Қазақстан өңіріндегі электр қуатының жетіспеушілігінің орнын толтыру мен Оңтүстік Қазақстан өңірін салынған электр желілерінен тұйықтау қамтамасыз етіледі деп күтілуде. Бұдан бөлек Шығыс Қазақстан өңіріндегі тау-кен өндірісі саласын электр қуатымен қамтамасыз ету мен теміржолды электрлендіру мүмкіндіктері қарастырылуда.
— Қазақстанның солтүстігінде электр қуатының артық мөлшері көп. Ал Оңтүстік Қазақстан өңірінде, керісінше, электр қуаты жеткіліксіздігі бар. Қазіргі таңда Оңтүстік Қазақстан облысының электр қуатын тұтыну мөлшері 3200 МВт-ты құраса, өңірдің өзінде өндірілетін электр қуатының көлемі Жамбыл МАЭС-ін есептемегенде бар-жоғы 1200 МВт қана. Оңтүстік Қазақстан облысындағы электр қуатының жетіспеушілігінің орны Солтүстік және Оңтүстік транзиттерінің есебінен толықтырылуда. Жаңа желі пайдалануға берілген уақытта, біз бұл өңірді тәуелділіктен толықтай арылту мүмкіндігіне ие боламыз,- деп атап өтті «KEGOK» АҚ басқарма басшысы.
Жаңа жоғары кернеулі желі Шығыс Қазақстан өңіріндегі де электр қуатының жетіспеушілігін жоюда маңызды рөл атқарады. Бақытжан Қажиев қазіргі таңда Шығыс Қазақстан өңірі өзінің қажеттіліктерін толықтай қамтамасыз ете алмай отырғанын, жетіспеушіліктің Ресейден тасымалдау арқылы толықтырылып келе жатқанын тілге тиек етті.
— Қазіргі уақытта Шығыс Қазақстан облысына жетпей тұрған электр қуатын тасымалдау ресейлік желілер арқылы, соның ішінде Рубцовск қаласынан жүзеге асырылуда. Сол себептен, бұл желілер ажыратылып қалған жағдайларда, бізде Шығыс Қазақстан облысын электр қуатымен қамтамасыз етуде қиындықтар туындайды. Жобаның аяқталып, желінің пайдалануға берілуі Шығыс Қазақстан облысының ресейлік транзиттерге тәуелділігін толықтай жояды,- деп атап өтті Бақытжан Қажиев.
Мирас ҚҰСАЙЫН,
«Семей таңы».
