Абай облысындағы білім беру жүйесінің дамуы тақырыбында арнайы баспасөз-туры ұйымдастырылды. БАҚ өкілдері және өңірлік коммуникациялар қызметіне жаңадан ашылған №50 ІТ мектеп-лицейі таныстырылып, оқу процессі көрсетілді.
Баспасөз туры аясында облыстық білім басқармасы басшысының орынбасары Айжан Құрманова облыстағы білім беру мекемелерінің негізгі міндеттерінің бірі білім алушылардың білім сапасын арттыру негізінде жүйелі жұмыстар жүргізу деп атап өтті.
— Бүгінде Абай облысында 226 486 баланы қамтитын 561 білім беру нысаны бар. 2024-2025 оқу жылының І тоқсан қорытындысы бойынша сапа көрсеткіші былтырғы осы мезгілмен салыстырғанда 4 %- ға артып отыр. «Цифрлық ұстаз» жобасы бойынша 2024-2025 оқу жылында 52 білім беру ұйымында қосымша сабақ жүргізуге 127 мұғалім қамтылып, білім алушылардың білімдегі олқылықтарын жою мақсатында білім беру платформаларын қолдану арқылы жұмыс жүргізілуде.
Облыс мектептері 100 % сандық білім беру ресурстары және электронды оқулықтармен қамтамасыз етілген — деді Айжан Құрманова.
Облыстың дарынды балаларына қолдау көрсету мақсатында «Абай облысының дарынды балаларын анықтаудың, дамытудың және қолдаудың 2023 — 2027 жылдарға арналған Кешенді жоспары» әзірленген. Өңірдің жетекші университетіндегі профессор-оқытушылар құрамы мен Семей қаласының НЗМ оқытушыларының қатысуымен «Профессорлық сағат» және «Бейін алды даярлық сыныптар» жобалары жүзеге асырылып, жақсы нәтиже көрсетуде.
— Облысымыздағы әрбір оқушының сапалы білім алып, жан-жақты дамуына қолайлы жағдай жасау үшін мектептердің инфрақұрылымын ретке келтіруге де қадамдар жасалуда. 2025-2026 жылдары жаңа мектеп ғимараты жергілікті бюджет есебінен және білім беру инфрақұрылымын қолдау қорының қаражаты есебінен салынуы арқылы 353 бала қолайлы жағдаймен қамтамасыз етілмек. Өздеріңіз көріп тұрғандай, биыл «KAZ Minerals Management» компаниясының қаражаты есебінен 1200 орындық ІТ мектеп-лицейі қолданысқа берілді. Қазіргі таңда бұл мектепте 2004 бала білім алуда, — деп қорытындылады Білім басқармасы басшысының орынбасары.
Сонымен қатар спикер 2025 жылы құрылысы аяқталатын Семей қаласында салынып жатқан көпфункционалды орталықтың (Оқушылар сарайының) іске қосылуы қосымша біліммен қамтуды ұлғайтуға мүмкіндік беретінін жеткізді.
